រាជធានីភ្នំពេញ៖ នៅវិមានសន្តិភាព សម្ដេចតេជោ ប្រកាសក្ដែងៗប្រាប់ឡាវឲ្យដកទ័ពចេញពីទឹកដីកម្ពុជា ក្នុងរយៈពេល៦ថ្ងៃជាកំហិត ពោលគឺយ៉ាងយូរបំផុតនៅត្រឹមថ្ងៃទី១៧ ខែសីហាខាងមុខនេះ។ ការប្រកាសឱសានវាទចុងក្រោយដល់ឡាវបែបនេះ បន្ទាប់ពីបញ្ហាព្រំដែនរវាងកម្ពុជា និងប្រទេសឡាវដែលរយៈពេលកន្លងមកនេះ ឡាវបានបញ្ជូនកងទ័ពចូលមកលើទឹកដីនៃ កម្ពុជា។
ក្នុងពិធីប្រកាសការចូលកាន់តំណែងប្រធានរាជបណ្ឌិតសភាកម្ពុជាថ្មី កាលពីមិញមិញនេះ សម្តេចក៏បានបញ្ជាឲ្យបណ្ដាញសារព័ត៌មានផ្សព្វផ្សាយ លិខិតផ្លូវការរបស់សម្តេច ដែលបានផ្ញើទៅកាន់នាយករដ្ឋមន្ត្រីឡាវកាលពីថ្ងៃទី២ សីហានេះ ដោយសុំឲ្យដកទាហានឡាវដែលចូលមកឈរជើងលើទឹកដីកម្ពុជាផងដែរ។
សម្តេចបន្ថែមថា កម្ពុជាមិនត្រូវការដីប្រទេសជិតខាងណាមួយចំអាមឡើយ ហើយប្រទេសជិតខាងដាច់ខាតមិនអនុញ្ញាតបំពានលើកម្ពុជាមួយចំអាមនោះដែរ។ ហើយនៅថ្ងៃទី ១២ សីហា ស្អែកនេះ សម្តេចនឹងទៅកាន់ប្រទេសឡាវ ដើម្បីពិភាក្សាជាលើកចុងក្រោយអំពីបញ្ហានេះជាមួយលោកនាយករដ្ឋមន្រ្តីឡាវ។
ប្រភព៖ SPM
