ប្រធានាធិបតីហ្វីលីពីនលោក Rodrigo Duterte បានគំរាមកំហែងបញ្ចេញកម្លាំងយោធាពេញលេញប្រឆាំងនឹងកងជីវពលឯកជនរបស់អ្នកនយោបាយពុករលួយ រួមទាំងការបញ្ជូនយន្តហោះចម្បាំង ដើម្បីទម្លាក់គ្រាប់បែកផងដែរ។ នេះបើយោងតាមសារព័ត៌មាន រុស្ស៊ី (RT) បានចុះផ្សាយនៅថ្ងៃពុធ ទី០៩ ខែសីហា ឆ្នាំ២០១៧។
លោក Duterte បានថ្លែងក្នុងសុន្ទរកថាឲ្យដឹងថា ខ្ញុំបានពង្រីកបញ្ជីឈ្មោះអ្នកនយោបាយដែលសង្ស័យពាក់ព័ន្ធនឹងការជួញដូរគ្រឿងញៀន ព្រមទាំងកងកម្លាំងប្រដាប់អាវុធដែលចូលរួមចំនួន ២០០នាក់ នឹងត្រូវបានចាប់ខ្លួននាពេលខាងមុខនេះ។ លោកបានបន្ថែមថា យន្តហោះចម្បាំងម៉ាក FA-50 ចំនួន ១២គ្រឿង និងកងកម្លាំងរដ្ឋាភិបាលរបស់លោក បានត្រៀមសម្រាប់ទុកធ្វើប្រតិបត្តិការចាប់ខ្លួនក្រុមនេះរួចជាស្រេច។
កងទ័ពឯកជន ដែលដឹកនាំដោយអ្នកនយោបាយ និងក្រុមឥស្លាម ដែលមានអំណាចយូរណាស់មកហើយនៅក្នុងកោះមីនដាណាវ ភាគខាងត្បូងប្រទេសហ្វីលីពីន ដែលត្រូវបានប៉ះទង្គិចជាមួយក្រុមបះបោរមូស្លីមដូចជាក្រុមភេរវកម្ម Abu Sayyaf និងរដ្ឋឥស្លាម (IS, ISIS/ISIL)។
គួររម្លឹកផងដែរថា កាលពីខែវិច្ឆិកា ឆ្នាំ២០០៩ លោក Duterte ត្រូវបានគេចោទប្រកាន់ពីបទធ្វើមនុស្សឃាតរាប់ពាន់នាក់ ទៅលើក្រុមអ្នកជួញដូរគ្រឿងញៀន អ្នកប្រព្រឹត្តចោរកម្ម និងឧក្រិដ្ឋជនតូចៗដទៃទៀតផងដែរ៕
