តារាចម្រៀងល្បីៗមួយចំនួនមិនសូវចាត់ទុកការបង្កើតទំនាក់ទំនងជាមួយ អ្នកគាំទ្រជារឿងសំខាន់ទេ ។ សកម្មភាពនេះតែងមានមតិរិះគន់ខ្លះៗថា តារាៗឲ្យតែល្បីភាគច្រើន គឺវ៉ៃឫកតែម្ដង។ ដោយឡែកតារាចម្រៀងល្បីលោក ថែល ថៃ បានយល់ឃើញថា ការបង្កើតទំនាក់ទំនងជាមួយអ្នកគាំទ្រ គឺជារឿងសំខាន់បំផុត ដូច្នេះហើយទើបលោកបានបង្កើតកម្មវិធីច្រៀង Liveផ្ទាល់ឲ្យអ្នកគាំទ្រ សំណូមពរ។
លោក ថែល ថៃ ក្រសោបបានប្រជាប្រិយភាពខ្លាំងលើវិថីសិល្បៈ ខណៈដែលលោកក្លាយម្ចាស់ពាន The Voice Cambodia រដូវកាលទី០២ ។ កិត្តិយសនេះធ្វើឲ្យក្លាយជាតារាលេចធ្លោក្នុងស្រទាប់យុវវ័យ តែលោកនៅតែធ្វើឫកពា សាមញ្ញមិនពើងទ្រូងឡើយ។ ចំណុចវិជ្ជមាននេះហើយទើបលោក មានអ្នកគាំទ្រកាន់តែខ្លាំង។
យ៉ាងណាមិញ ពេលនេះលោកនៅតែរក្សាទំនាក់ទំនងល្អជាមួយអ្នកគាំទ្រ រហូតបានបង្កើតកម្មវិធីច្រៀង Live ផ្ទាល់ឲ្យអ្នកគាំទ្រសំណូមពរ នៅរៀងរាល់ថ្ងៃអាទិត្យ វេលាម៉ោង៨យប់។ ថែល ថៃ បានបញ្ជាក់ថា មួយរយៈនេះលោកមិនសូវបាន Liveវីដេអូទេ ទើបមិនសូវបានសំណេះសំណាលជាមួយអ្នកគាំទ្រ ដូច្នេះហើយនៅពេលនេះលោកបង្កើតកម្មវិធីឡើង គឺដើម្បីបាននិយាយលេងជាមួយអ្នកគាំទ្រ និងច្រៀងជូនពួកគាត់ស្ដាប់កម្សាន្ត ពេលម៉ោងទំនេរ។
លោកបន្តថា គោលបំណងបង្កើតកម្មវិធីនេះមិនចង់បានការ Like នោះទេ តែអ្វីដែលជាបំណងប្រាថ្នារបស់លោក គឺចង់បម្រើបងប្អូនដែលជាអ្នកគាំទ្រ ទើបលោកបង្កើតកម្មវិធី Live អាចឲ្យអ្នកកំពុងទស្សនា Comment ចូលសំណូមពរឲ្យលោកចម្រៀងផ្ទាល់បាន ៕
