ភ្នំពេញៈ បុរសវ័យចំណាស់ម្នាក់ បានរត់ឡើងជាន់ទី៥ បម្រុងលោតសម្លាប់ខ្លួន ប៉ុន្តែត្រូវអ្នកជិតខាងឃាត់ និងចាប់ចងដៃចងជើង សង្ស័យខ្មោចចូល ហើយដឹកយកមកវត្តឲ្យលោកសង្ឃស្រោចទឹក ។
ហេតុការណ៍នេះកើតឡើងកាលពីវេលាម៉ោង១០យប់ថ្ងៃទី២៦ ខែកញ្ញា ឆ្នាំ២០១៧ ស្ថិតនៅម្តុំផ្ទះជួល នៅក្នុងសង្កាត់ទួលសង្កែ ខណ្ឌឬស្សីកែវ ។
អ្នកឃើញហេតុការណ៍ បានឲ្យដឹងថា មុនពេលកើតហេតុបុរសវ័យចំណាស់បានរត់ចេញពីបន្ទប់ជួលជាន់ទី៣ ឡើងទៅលើដំបូលផ្ទះជាន់ទី៥ បម្រុងលោតចុះមកក្រោម ប្រជាពលរដ្ឋឃើញដូចនេះនាំគ្នាចាប់ឃាត់ចងដៃចងជើង ដោយសង្ស័យថា មានខ្មោចចូលក៏ចាប់ដឹកទៅវត្តវិញាណ្ណរង្ស៊ី ដើម្បីឲ្យលោកសង្ឃស្រោចទឹក ប៉ុន្តែនៅតែមិនបានធូរស្បើយនោះទេ។
បន្ទាប់មករឿងនេះ បានលេចឮក្រុមគ្រួសារមកទទួលគាត់យកទៅមន្ទីពេទ្យរុស្សី ដើម្បីព្យាបាល ហើយបងប្អូនជនរងគ្រោះបញ្ជាក់ថា បុរសវ័យចំណាស់ខាងលើនេះ មិនមែនត្រូវខ្មោចចូលនោះទេ គឺមានវិបត្តិផ្លូវ ព្រោះទើបតែបែកបាក់គ្រួសារ៕
