មន្ត្រីក្រសួងការពារជាតិកូរ៉េខាងត្បូង បានប្រាប់ឲ្យដឹងថា លោក គីម ជុងអ៊ុន កំពុងរៀបចំបាញ់បង្ហោះមីស៊ីលឆ្លងទ្វីបមួយបន្ថែមទៀត ខណៈភាពតានតឹងរវាងក្រុងព្យុងយ៉ាង និងសហរដ្ឋអាមេរិក បានឈានដល់ចំណុចមិនអាចដោះស្រាយបាន។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនាព្រឹកថ្ងៃច័ន្ទ ទី០៤ ខែកញ្ញា ឆ្នាំ២០១៧។
មន្ត្រីការពារជាតិកូរ៉េខាងត្បូងលោក Chang Kyung-soo បាននិយាយថា "យើងបន្តមើលពីសញ្ញានៃការបាញ់មីស៊ីល ដែលអាចធ្វើបន្ថែមទៀត ហើយយើងក៏បានព្យាករណ៍ថាកូរ៉េខាងជើងអាចបាញ់មីស៊ីលឆ្លងទ្វីបសេរីថ្មី មានសមត្ថភាពខ្លាំងអាចបំពាក់ជាមួយមីស៊ីល (ICBM)"។
ទន្ទឹមនឹងនេះដែរក្រសួងការពារជាតិ បានបញ្ជាក់ថា ក្រុងសេអ៊ូល ឥឡូវនៅមានពេលវេលា ដើម្បីពង្រឹងការឆ្លើយតបផ្នែកយោធារបស់ខ្លួនប្រឆាំងនឹងប្រទេសកូរ៉េខាងជើង ដែលបង្ហាញថា ពេលវេលាសម្រាប់ការចរចាត្រូវបានបញ្ចប់។
គួរបញ្ជាក់ផងដែរថា ក្រុមប្រឹក្សាសន្តិសុខអង្គការសហប្រជាជាតិ គ្រោងនឹងរៀបចំកិច្ចប្រជុំបន្ទាន់មួយនៅថ្ងៃនេះ ដើម្បីពិភាក្សាពីការឆ្លើយតបរបស់ខ្លួន ចំពោះការធ្វើតេស្តចុងក្រោយបំផុតរបស់កូរ៉េខាងជើង និងកូរ៉េខាងត្បូង ព្រមទាំងសម្ព័ន្ធមិត្ត ជំរុញឲ្យមានដំណោះស្រាយរឹងមាំលើបញ្ហានាពេលថ្មីៗនេះ៕
