កូរ៉េខាងត្បូង បានធ្វើសមយុទ្ធបាញ់គ្រាប់ពិតមួយ ដោយធ្វើការវាយប្រហារទៅលើតំបន់នុយក្លេអ៊ែររបស់កូរ៉េខាងជើង ដោយយន្តហោះចម្បាំង និងមីស៊ីលឆ្លងទ្វីប។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃ០៤ ខែកញ្ញា ឆ្នាំ២០១៧។
អគ្គសេនាធិការយោធារួម បានប្រាប់ឲ្យដឹងថា សមយុទ្ធរួមបញ្ចូលគ្នារវាងមីស៊ីលផ្លោង Hyunmoo-2A ចំនួន ០៥គ្រាប់ របស់កូរ៉េខាងត្បូង និងយន្តហោះប្រយុទ្ធ F-15K ដោយធ្វើការវាយប្រហារ ក្បែរកន្លែងសាកល្បងមីស៊ីលឈ្មោះ Punggye-ri របស់កូរ៉េខាងជើង។ យោធាបានបន្ថែមថា លំហាត់សមយុទ្ធនេះ គឺគ្រាន់តែជាការបង្ហាញពីអំណាចដំបូងប៉ុណ្ណោះ និងព្រមានថា យើងកំពុងរៀបចំវិធានការបន្ថែមទៀត ដោយសម្ពន្ធភាពរវាងកូរ៉េខាងត្បូង និងសហរដ្ឋអាមេរិក។
គួរបញ្ជាក់ផងដែរថា ទីភ្នាក់ងារព័ត៌មានចិន បានរាយការណ៍ថា ក្រោយកិច្ចប្រជុំកំពូល BRICS នៅក្នុងទីក្រុង Xiamen ប្រទេសចិន ប្រធានាធិបតីរុស្ស៊ីលោក Vladimir Putin និងសមភាគីចិនលោក ស៊ីជីនភីង បានព្រមព្រៀងគ្នាថា នឹងដោះស្រាយរាល់បញ្ហា និងថ្កោលទោសយ៉ាងខ្លាំងចំពោះការធ្វើតេស្តមីស៊ីលចុងក្រោយរបស់កូរ៉េខាងជើង៕
