ភ្នំពេញៈ ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស លោក Zeid Ra'ad Al Hussein មានការព្រួយបារម្ភយ៉ាងខ្លាំង ចំពោះការចាប់ខ្លួនលោក កឹម សុខា មេដឹកនាំគណបក្សប្រឆាំងខ្លាំងនៅកម្ពុជា ដែលទំនងជាត្រូវបានអនុវត្តន៍ដោយគ្មានការគោរពចំពោះការធានាតាមនីតិវិធីត្រឹមត្រូវ។
យោងតាមទំព័រហ្វេសប៊ុកករបស់លោក កឹម សុខា នៅយប់ថ្ងៃទី៤ ខែកញ្ញា ឆ្នាំ២០១៧ បានឲ្យដឹងថា "សេចក្តីអត្ថាធិប្បាយរបស់ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ស្តីពីការចាប់ខ្លួនលោក កឹម សុខា។
"ខ្ញុំមានការព្រួយបារម្ភយ៉ាងខ្លាំងចំពោះការចាប់ខ្លួនលោក កឹម សុខា មេដឹកនាំគណបក្សប្រឆាំង ដែលទំនងជាត្រូវបានអនុវត្តន៍ដោយគ្មានការគោរពចំពោះការធានាតាមនីតិវិធីត្រឹមត្រូវ រួមទាំងការគោរពចំពោះអភ័យឯកសិទ្ធិសភារបស់លោក"។
អង្គការសហប្រជាជាតិ បន្ដទៀតថា លោក កឹម សុខា ត្រូវបានចោទប្រកាន់ពីបទក្បត់ជាតិ ដែលប្រឈមនឹងការជាប់ពន្ធនាគាររយៈពេលចន្លោះពី១៥ទៅ៣០ឆ្នាំ ដោយផ្អែកលើវីដេអូទាក់ទិននឹងសុន្ទរកថា ដែលលោកបានថ្លែងកាលពីឆ្នាំ២០១៣ ហើយដែលត្រូវបានផ្សព្វផ្សាយជាសាធារណៈចាប់តាំងពីពេលនោះមក។
អង្គការសហប្រជាជាតិ ក៏មានការព្រួយបារម្ភផងដែរ អំពីសេចក្តីថ្លែងការណ៍ជាសាធារណៈជាច្រើន របស់នាយករដ្ឋមន្ត្រី និងមន្ត្រីជាន់ខ្ពស់ ចំពោះការសន្មត់ពិរុទ្ធភាពរបស់លោក កឹម សុខា ដែលជាការរំលោភលើគោលការណ៍នៃការសន្មត់ជាមុនអំពីការគ្មានទោស និងសិទ្ធិទទួលបានការជំនុំជម្រះដោយយុត្តិធម៌ ដែលលោកត្រូវមានសិទ្ធិទទួលបានក្រោមច្បាប់កម្ពុជា និងច្បាប់ស្តីពីសិទិ្ធមនុស្សអន្តរជាតិ។
ការចាប់ខ្លួនរបស់លោក កឹម សុខា គឺជារឿងគួរឲ្យព្រួយបារម្ភបំផុត ដោយសារការចាប់ខ្លួននេះ កើតឡើងចំពេលមានវិធានការថ្មីៗជាច្រើនពីសំណាក់រាជរដ្ឋាភិបាលកម្ពុជា។
វិធានការទាំងនេះ បាននាំឲ្យមានការបិទអង្គការក្រៅរដ្ឋាភិបាលបរទេសមួយ និងបានប៉ុនប៉ងមកលើក្រុមហ៊ុនប្រព័ន្ធផ្សព្វផ្សាយនានា ដែលរួមទាំងស្ថានីយ៍វិទ្យុជាច្រើន និងកាសែតជាភាសាអង់គ្លេសឯករាជ្យដ៏សំខាន់មួយ គឺ The Cambodia Daily ដែលឥឡូវត្រូវបានបង្ខំឲ្យបញ្ឈប់ការបោះពុម្ពផ្សាយ បន្ទាប់ពីបានប្រតិបត្តិការអស់រយៈពេល២៤ឆ្នាំ។
ពាក់ពន្ធ័បញ្ហាទាំងនេះ សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានធ្លាប់មានប្រសាសន៍ថា “បើបក្សចេញមុខមកការពារបុគ្គល បក្សក៏ត្រូវប្រឈមនឹងការរំលាយចោលដែរ។ កុំថាប្រទេសនេះ ផ្តាច់ការអត់ទេ រដ្ឋអធិបតេយ្យមួយមិនអាចឲ្យបរទេសមកធ្វើរបៀបនេះទេ នេះជាអំពើក្បត់ជាតិ យកផលប្រយោជន៍ ជាតិឲ្យបរទេស អ្វីៗដើម្បីតែផ្តួលរំលំឡើងកាន់អំណាចខ្លួនឯង។ អាមេរិកាំង ធ្លាប់ធ្វើរឿងនេះជាមួយ លន់ នល់ អាមេរិកាំង ក៏ធ្វើរឿងនេះ ជាមួយ កឹម សុខា ទៀត”។
សម្តេច ហ៊ុន សែន ក៏បានអំពាវនាវដល់ពលរដ្ឋនៅទូទាំងប្រទេស រក្សាភាពស្ងៀមស្ងាត់ ដោយទុកឲ្យតុលាការដោះស្រាយតាមនីតិវិធី៕
