ភ្នំពេញៈ យុវជន២នាក់ ទាស់ពាក្យសម្ដីគ្នាបន្តិចបន្តួច បង្កទៅជាហិង្សាម្នាក់ដេកពេទ្យម្នាក់ចូលប៉ុស្ថិ៍ កាលពីវេលាម៉ោង១៖០៥នាទីថ្ងៃត្រង់ ថ្ងៃទី២៦ ខែកញ្ញា ឆ្នាំ២០១៧ នៅត្រង់ចំនុចផ្លូវរថភ្លើង សង្កាត់បឹងកក់ទី១ ខណ្ឌទួលគោក ។
សមត្ថកិច្ចបានឲ្យដឹងថា ជនបង្កមានឈ្មោះ ជុន ស៊ីនាង ភេទប្រុស អាយុ៣០ឆ្នាំ មុខរបរ រត់ម៉ូតូឌុប ស្នាក់នៅផ្ទះលេខ១១ ផ្លូវរថភ្លើង ភូមិ១៤ សង្កាត់បឹងកក់ទី១ ខណ្ឌទួលគោក ។ ចំណែកជនរងគ្រោះមានឈ្មោះ ពៅ ភេទប្រុស អាយុ២៥ឆ្នាំ មុខរបរ រើសអេតចាយ ស្នាក់នៅមិនពិតប្រាកដ ។
បើតាមសម្ដីប្រជាពលរដ្ឋ ដែលឃើញហេតុការណ៍ បានប្រាប់ឲ្យដឹងថា មុនពេលកើតហេតុគេឃើញជនបង្កអង្គុយហូបបាយ នៅមុខផ្ទះជាមួយគ្រួសារស្រាប់ តែជនរងគ្រោះបានអូសរទេះអេតចាយ រួមនឹងទ្វារដែកពីរសន្លឹកមកដល់មុខផ្ទះ ជនបង្កស្រាប់តែបានស្រែកប្រាប់ទៅបុរសឈ្មោះពៅថា (បើឯងលួចរបស់គេចឹងកុំយកចូលភូមិពេលថ្ងៃចឹង) ស្រាប់តែជនរងគ្រោះស្រែកវិញថា (ជារឿងរបស់អញមិនទើសក្បាលម៉ែអាណាទេ) ភ្លាមនោះដោយការខឹងសម្បារយ៉ាងខ្លាំងជនបង្កបានទាញដុំថ្មគប់ទៅលើ ពៅ ចំជើងខាងឆ្វេងបណ្ដាលមានឈាម ។ដោយសារតែកំហឹង ពៅ បានទាញដំបងឈើជ្រុងស្ទុះទៅវ៉ៃជនបង្កតែត្រូវជនបង្កចាប់ឈើបានរុញទៅបុកដើមទ្រូងរបស់ ពៅ បណ្ដាលឲ្យដួលសន្លប់ស្ដូកស្ដឹង ក៏ត្រូវរថយន្តសង្គ្រោះបន្ទាប់របស់មន្ទីរពេទ្យកាល់ម៉ែត្រដឹកយកទៅសង្គ្រោះ ចំណែកជនបង្កត្រូវបានសមត្ថកិច្ចដឹកយកទៅប៉ុស្ថិ៍ដើម្បីសាកសួរ៕
