គ្រូមួយថ្ងៃ គឺគ្រូមួយជីវិត! សាស្ត្រាចារ្យ ភុល ជឹម អាយុ៧៣ឆ្នាំ ធ្លាប់មានឈ្មោះល្បីល្បាញលើការបង្រៀនមុខវិជ្ជាអក្សរសាស្ត្រខ្មែរនៅវិទ្យាល័យបាក់ទូក និងសាលារៀនឯកជន ជ័យ ថាវី ក្នុងរាជធានីភ្នំពេញ។ បច្ចុប្បន្ន សាស្ត្រាចារ្យដែលមានរហស្សនាមថា «គ្រូតា» រូបនេះ ស្ថិតក្នុងការសង្គ្រោះបន្ទាន់នៅមន្ទីរពេទ្យឡាសង់តេ ខណៈសមាជិកគ្រួសារអំពាវនាវរកជំនួយឈាម និងថវិកាពីសប្បុរសជន។
បន្ទាប់ពីស្ថិតក្នុងបន្ទប់សង្គ្រោះបន្ទាន់ជាច្រើនសប្តាហ៍ គ្រូតា ភុល ជឹម ដែលជាគ្រូបង្រៀនដ៏ល្បីល្បាញផ្នែកអក្សរសាស្ត្រខ្មែរនៅវិទ្យាល័យបាក់ទូក បានទទួលមរណភាពនៅម៉ោង៧កន្លះព្រឹក នាថ្ងៃទី១៣ ខែសីហានេះ។
ប៉ុន្តែមកដល់ថ្ងៃនេះផងដែរ បើយោងតាមគណនីហ្វេសប៊ុក ឈ្មោះ Peter Chim បានបង្ហោះសារដោយសរសេរថា៖ លោកគ្រូ ភុល ជឹម ហៅលោកគ្រូតា បានលាចាកលោកនេះហើយ ក្រុមគ្រួសាររបស់លោកគ្រូមានទុក្ខដ៏ក្រៀមក្រំសូមគោរពជម្រាបជូនសាធារណជន បងប្អូន មិត្តភក្រ្ត អតីតកូនសិស្សគ្រប់ជំនាន់ទាំងអស់ឲ្យបានជ្រាបជាព័ត៌មាន និងសូមគោរពអញ្ជើញអស់លោកអ្នកសប្បុរសទាំងអស់មកគោរពវិញ្ញាណក្ខន្ធ ក៏ដូចជាគោរពជម្រាបលាលោកគ្រូជាចុងក្រោយ នៅម្តុំគល់អង់តែនទួលគោក អសយដ្ឋានផ្ទះលេខ 3A ផ្លូវលេខ 351 សង្កាត់ បឹងកក់ទី ១ ខណ្ឌ ទួលគោក រាជធានីភ្នំពេញ ព័ត៌មានបន្ថែមសូមទូរស័ព្ទមកលេខ 077585158 010932667 012474688
ដោយឡែក លោក ជូ ចន្ទតារារិទ្ធិ កូនប្រុសបង្កើតរបស់គ្រូតា ភុល ជឹម បានសរសេរនៅលើគណនីហ្វេសប៊ុក(Chou Chan Dararith)របស់ខ្លួនថា លោកឪពុករបស់លោកបានទទួលមរណភាពនៅម៉ោង៧ និង៣០នាទី ថ្ងៃទី១៣ ខែសីហានេះ។ លោកសរសេរថា៖ «លោកប៉ា បានទទួលមរណភាពហើយនៅម៉ោង៧ និង៣០នាទីព្រឹក នាថ្ងៃទី១៣ ខែសីហា នៅមន្ទីរពេទ្យឡាសង់តេ ក្នុងជន្មាយុ ៧៣ឆ្នាំ»។ បើតាមលោក ជូ ចន្ទតារារិទ្ធ បច្ចុប្បន្ន សពរបស់លោកគ្រូតា ភុល ជឹម ត្រូវបានក្រុមគ្រួសារយកមករៀបចំចាត់ចែងធ្វើបុណ្យនៅផ្ទះលេខ៣A ផ្លូវលេខ៣៤៩ សង្កាត់បឹងកក់១ ខ័ណ្ឌទួលគោក រាជធានីភ្នំពេញ នៅម្តុំអង់តែនទួលគោក។
រំឮឹកឡើងវិញៈ បើតាមលោក ជូ ចន្ទតារារិទ្ធ គិតត្រឹមល្ងាចថ្ងៃទី១១ ខែកញ្ញា លោកគ្រូតា ភុល ជឹម កំពុងស្ថិតនៅបន្ទប់សង្គ្រោះបន្ទាន់នៅឡើយ។ លោកបញ្ជាក់ថា៖«ឥឡូវហ្នឹង គាត់កំពុងដាក់អ៊ុកស៊ីសែន ព្រោះគាត់ពិបាកដកដង្ហើម ស្ថានគាត់កំពុងភាពធ្ងន់ធ្ងរ»។ លោកបន្តថា ជំងឺឪពុករបស់ខ្លួន គឺមានស្ថានភាពធ្ងន់ធ្ងរប្រមាណ៣សប្តាហ៍មកហើយ។
«ស្ថានភាពជំងឺរបស់លោកឪពុក (លោកគ្រូតា) កំពុងដង្ហក់ និងខ្សោយទៅៗ ឈានឆ្ពោះទៅរកសភាពធ្ងន់ធ្ងរ ហើយក្រុមគ្រូពេទ្យតម្រូវឲ្យមានការលាងឈាមជាបន្ទាន់។ បច្ចុប្បន្នកំពុងត្រូវការជំនួយឈាមសង្គ្រោះ និងថវិកាព្យាបាល ក្រុមគ្រួសារកំពុងមានការព្រួយបារម្ភជាខ្លាំង កូនចៅបាននឹងកំពុងបរិច្ចាគឈាម ប៉ុន្តែមិនគ្រប់គ្រាន់ សូមអំពាវនាវស្វែងរកជំនួយឈាមសង្គ្រោះ និងជំនួយថវិកាបន្ថែម»។ នេះជាការអំពាវរបស់ លោក ជូ ចន្ទតារារិទ្ធ កូនប្រុសបង្កើតរបស់លោកគ្រូ ភុល ជឹម តាមរយៈសារព័ត៌មានថ្មីៗ ។
គ្រូតា ភុល ជឹម ដែលមានវ័យ ៧៣ឆ្នាំ គឺជាគ្រូបង្រៀនដែលសិស្សានុសិស្សស្គាល់ថាជា «លោកគ្រូតា» ផ្នែកអក្សរសាស្ត្រខ្មែរ ដ៏ល្បីម្នាក់នៅសាលាបង្រៀនគួរជ័យថាវី។
បើតាមការផ្សាយរបស់កាសែតភ្នំពេញប៉ុស្តិ៍ លោកគ្រូ ភុល ជឹម ចាប់អាជីពជាគ្រូបង្រៀននៅថ្ងៃទី ៥ ខែ វិច្ឆិកា ឆ្នាំ ១៩៨០ នៅវិទ្យាល័យបាក់ទូក។ អំឡុងពេលបង្រៀននៅវិទ្យាល័យបាក់ទូក លោកគ្រូត្រូវបានគេផ្តល់ឱកាសឲ្យសិក្សាបំប៉នរយៈពេលខ្លី នៅវិទ្យាល័យព្រះស៊ីសុវត្ថិ នៅអំឡុងពេលវិសមកាលម្តងៗផងដែរ។
នៅឆ្នាំ ១៩៨៣ លោក ភុល ជឹម ត្រូវបានគេផ្ទេរឲ្យមករៀនបំប៉នវគ្គវែងនៅសាលាគរុកោសល្យជាន់ខ្ពស់ ដែលសព្វថ្ងៃត្រូវបានគេស្គាល់ថាជាសាកលវិទ្យាល័យភូមិន្ទភ្នំពេញ (RUPP)។ នៅឆ្នាំ ១៩៨៦ លោក បានប្តូរទៅបង្រៀននៅមជ្ឈមណ្ឌលភូមិភាគគរុកោសល្យនៅអូរបែកក្អម រហូតដល់ចូលនិវត្តន៍ នៅថ្ងៃទី ០១ ខែមករា ឆ្នាំ ២០០៧៕
