កងទ័ពជើងទឹកអីុរ៉ង់ បានបញ្ជូនសញ្ញាព្រមានដល់នាវាជើងទឹកអាមេរិក ដែលបានបាញ់ទូកនេសាទខ្លួន បណ្ដាលឲ្យលិច នៅឈូងសមុទ្រពែក្ស។ នេះបើយោងតាមគេហទំព័រសារព័ត៌មាន Sputnik បានចុះផ្សាយនាព្រឹកថ្ងៃច័ន្ទ ទី១១ ខែកញ្ញា ឆ្នាំ២០១៧។
យោងតាមសេចក្ដីថ្លែងការណ៍របស់ទូកនេសាទ Shams ដែលបានធ្វើដំណើរចម្ងាយ ៧២គីឡូម៉ែត្រពីកំពង់ផែ Jask ក្នុងខេត្ត Hormozgan ប្រទេសអីុរ៉ង់ ដើម្បីធ្វើតេស្តម៉ាស៊ីន ក្រោយពីទទួលសញ្ញាអាសន្ន នាវាចម្បាំង Falahen បានបើកការជួយសង្គ្រោះទូក ដែលកំពុងលិចភ្លាម។ នាវាចម្បាំង Falahen បានបញ្ជូនសញ្ញាព្រមានឲ្យ នាវាជើងទឹកអាមេរិកមួយគ្រឿង ដែលមកពីកងពលលេខ២ ចាកចេញពីតំបន់ជម្លោះភ្លាមៗ។
គួរបញ្ជាក់ផងដែរថា កាលពីថ្ងៃទី៣ ខែកក្កដា ឆ្នាំ១៩៨៨ មានឧបទ្ទវហេតុដ៏ធំមួយ កើតឡើងនៅពេលដែលនាវាដឹកមីស៊ីលអាមេរិក USS Vincennes បានបាញ់ទម្លាក់យន្តហោះមួយគ្រឿង ចេញពីអីុរ៉ង់ ទៅកាន់ទីក្រុងឌូបៃ បណ្ដាលឲ្យមនុស្ស ២៩០នាក់ស្លាប់៕
