ភ្នំពេញៈ ក្មេងស្រីពីរនាក់ ត្រូវបានទឹកត្រពាំងឆក់យកជីវិតភ្លាមៗ បន្ទាប់ពីពួកគេ បាននាំគ្នាចុះទៅហែលលេង កាលពីវេលាម៉ោង១២ថ្ងៃត្រង់ ទី៧ កញ្ញា ២០១៧ ស្ថិតនៅក្នុងភូមិសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ។
តាមសម្តីប្រជាពលរដ្ឋរស់នៅក្បែរកន្លែងកើតហេតុ បានរៀបរាប់ថា មុនពេលកើតហេតុ គេឃើញក្មេងទាំង២នាក់ បានចុះទៅលេងទឹកត្រពាំងដែលនៅខាងមុខផ្ទះ ស្របពេលនេះក៏មានកុមារីម្នាក់ បានលង់ទឹក ហើយពេលនេះកុមារីម្នាក់ទៀតក៏បានទៅជួយ ស្រាប់តែលង់ទាំងពីរនាក់តែម្តង។
ប្រភពដដែលបន្តថា បន្តិចក្រោយមក ក៏មានការឆោឡោដល់បងប្អួនប្រជាពលរដ្ឋជាច្រើននាក់ជួយចុះរាវរក និងស្រងក្មេងរងគ្រោះម្នាក់យកមកជួយសង្គ្រោះ ហើយក៏បានបន្តរាវរកឃើញម្នាក់ទៀត ហើយនាំគ្នាជួយសង្រ្គោះដែរ តែជាអកុសលក្មេងស្រីរងគ្រោះទាំងពីរ បានបាត់ជីវិតបាត់ទៅហើយ។
បើតាមសម្ដីអណាព្យាបាលក្មេងរងគ្រោះ បានឲ្យដឹងថា ក្មេងរងគ្រោះទី១ឈ្មោះ លី ស្រីណា អាយុ៨ឆ្នាំ និងទី២ឈ្មោះ ជិម ស្រីណូ អាយុ៩ឆ្នាំ រស់នៅភូមិសំបូរ សង្កាត់ព្រៃវេង ខណ្ឌដង្កោ រាជធានីភ្នំពេញ។
ក្រោយកើតហេតុសត្ថកិច្ចមូលដ្ឋានចុះពិនិត្យលើសាកសពក្មេងស្រីរងគ្រោះទាំងពីរ រួចប្រគល់ឲ្យឪពុកម្តាយយកទៅធ្វើបុណ្យតាមប្រពៃណី។
សូមបញ្ជាក់ថា ជុំវិញករណីទឹកត្រញាំងឆក់យកជីវិតក្មេងស្រីទាំងពីរនាក់ខាងលើនេះ ប្រជាពលរដ្ឋ បានស្នើសុំឲ្យអាជ្ញាធរលុបត្រពាំងនេះចោល ព្រោះខ្លាចមានក្មេងៗលង់ទឹកតទៅទៀត៕
