ភ្នំពេញៈ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានអំពាវនាវប្រជាពលរដ្ឋទូទាំងប្រទេសកម្ពុជា ពេលធ្វើដំណើរទៅជួបជុំក្រុមគ្រួសារ នៅតាមខេត្តនានាមានសុខសុវត្តិភាពតាមផ្លូវ និងគោរពច្បាប់ចរាចរណ៍ផងដែរ។
យោងតាមគេហទំព័រហ្វេសប៊ុក របស់សម្ដេច ហ៊ុន សែន នៅព្រឹកថ្ងៃទី១៧ ខែកញ្ញា ឆ្នាំ២០១៧ បានលើកឡើងថា ថ្ងៃនេះ គឺបិណ្ឌទី១២ នៅសល់តែ៣ថ្ងៃទៀត ពិធីបុណ្យភ្ជុំបិណ្ឌធំនឹងមកដល់ ដោយសារប្រទេសជាតិ មានសន្តិភាព ទើសមានឱកាសអាចប្រារព្ធពិធីបុណ្យសាសនានានាបាន។
សម្ដេច ហ៊ុន សែន បានមានប្រសាសន៍ថា "សូមបងប្អូនធ្វើដំណើរទៅជួបជុំក្រុមគ្រួសារនៅតាមខេត្តនានាមានសុខសុវត្តិភាពតាមផ្លូវ ហើយសូមបើកបរ គោរពច្បាប់ចរាចរណ៍ និងមានការយោគយល់អធ្យាស្រ័យខ្ពស់ទាំងអស់គ្នា"។
សម្ដេចបន្ដថា ដោយសារតែពេលនេះ ពលរដ្ឋ ធ្វើដំណើរកាន់តែច្រើនឡើងទៅតាមខេត្ត កុំបើកបរលឿនលើសល្បឿន ឬវ៉ាប្រជែងនៅលើផ្លូវតូចចង្អៀត និងនៅតាមទីប្រជុំជននានា ដែលមានអ្នកធ្វើដំណើរច្រើន និងមានមនុស្សឆ្លងកាត់ច្រើន។
សម្ដេច ជូនពរបងប្អូនជនរួមជាតិទាំងក្នុង និងក្រៅប្រទេសជួបតែសេចក្តីសុខ និងសំណាងល្អនៅក្នុងឱកាសបុណ្យ ភ្ជុំបិណ្ឌគ្រប់ៗគ្នា ។
ជុំវិញបញ្ហាទាំងនេះផងដែរ រដ្ឋបាលរាជធានីភ្នំពេញ កាលនៅថ្ងៃទី១៦ ខែកញ្ញានេះ បានអំពាវនាវដល់ម្ចាស់ក្រុមហ៊ុនដឹកជញ្ជូន និងរថយន្តឈ្នួលទាំងអស់ មេត្តាកុំដំឡើងថ្លៃសេវាដឹកជញ្ជូន និងកុំដឹកអ្នកដំណើរលើសចំណុះ ក្នុងឱកាសបុណ្យភ្ជុំបិណ្ឌ ឆ្នាំ២០១៧ ។
ចំណែកក្រសួងមហាផ្ទៃ បានដាក់កម្លាំងនគរបាលចរាចរណ៍ជាង២ពាន់នាក់ ត្រូវបានដាក់ពង្រាយ ក្នុងឱកាសបុណ្យកាន់បិណ្ឌ និងភ្ជុំបិណ្ឌ នៅតាមទីវត្តអារាម ដើម្បីការពារសុវត្ថិភាពជូនប្រជាពលរដ្ឋនៅទូទាំងប្រទេសកម្ពុជា ។
សូមបញ្ជាក់ថា គ្រោះថ្នាក់ចរចារណ៍អំឡុងពេល បុណ្យកាន់បិណ្ឌ-ភ្ជុំបិណ្ឌ ចំនួន១៥ថ្ងៃ ក្នុងឆ្នាំ២០១៦ បានកើតមានឡើង ចំនួន១៤៣លើក ក្នុងនោះមានមនុស្សស្លាប់ ចំនួន៧៦នាក់ និងអ្នករងរបួសធ្ងន់ ចំនួន១៣៥នាក់ និងរងរបួសស្រាល ចំនួន៨៣នាក់ ៕
