រាជធានីភ្នំពេញ៖ បន្ទាប់ពី ជនល្មើស ឈ្មោះ អង សំណាង ត្រូវបានព្រះរាជអាជ្ញាចោទប្រកាន់ពីបទ «ឃាតកម្មគិតទុកជាមុន» ដែលប្រឈមនឹងការជាប់ពន្ធនាគារអស់មួយជីវិត ហើយត្រូវតុលាការសម្រេចឃុំខ្លួន នោះ អ្នកស្រី ពេជ្រ សាខុន បានធ្វើដំណើរមកដល់រាជធានីភ្នំពេញ ដែលរួមដំណើរដោយអ្នកជិតខាងភូមិផងរបងជាមួយមកជាមួយផង កាលពីថ្ងៃត្រង់ថ្ងៃទី៥ ខែកញ្ញា ឆ្នាំ២០១៧ អ្នកស្រី បានអះអាងថាខ្លួនជាប្រពន្ធរបស់ឈ្មោះ អង សំណាង ជាឃាតកដៃឆៅ ចិត្តសាហាវ សម្លាប់កូនស្រីខ្លួន និងឪពុកក្មេកខ្លួន ក្នុងពេលតែមួយថ្ងៃ បានធ្វើឲ្យនាងនិងគ្រួសាររងគ្រោះរូបនេះរងនូវសេចក្ដីឈឺចាប់ ខ្លោចផ្សាគ្មានអ្វីប្រៀបបាន និងមិនអាចបំភ្លេចបានអស់មួយជីវិត។ បើយោងតាមកិច្ចសម្ភាសរបស់សារព័ត៌មានអនឡាញក្នុងស្រុកមួយ ។
ក្នុងបទសម្ភាសដែលផ្សាយផ្ទាល់តាមហ្វេសប៊ុក នាងបានអះអាងថា នាងឈ្មោះ ពេជ្រ សាខុន អាយុ ២៧ឆ្នាំ ជាកម្មការិនីរោងចក្រ រស់នៅភូមិទន្លៀង ឃុំរមាំងថ្កោ ស្រុកស្វាយទាបខេត្តស្វាយរៀង មានប្ដីឈ្មោះ អង សំណាង អយុ២៦ឆ្នាំ មានកូនស្រីឈ្មោះ ពេជ្រ ចរិយា អាយុ ២ខួប៦ខែ មានឪពុកឈ្មោះ ពេជ្រ ជឿន អាយុ ៥៧ឆ្នាំ និងម្ដាយឈ្មោះ ទាង សាវឿន អាយុ៤៧ឆ្នាំ។ នាងបានរៀបរាប់បន្តថា ដំបូងឡើយនាងបានស្គាល់បុរសជាប្ដីតាមទូរស័ព្ទ ក្រោយមកក៏បានណាត់ជួបគ្នានៅភ្នំពេញ ម្ដុំលូ៥ ពួកគេក៏បានស្រឡាញ់គ្នាហើយបានរៀបការតាមប្រពៃណី។ តែចាប់តាំងពីចាប់ដៃគ្នាមក បុរសជាប្ដីមិនដែលប្រកបមុខរបររកស៊ីចិញ្ចឹមជីវិត និងផ្គត់ផ្គង់គ្រួសារទេ គឺដេកស៊ីនៅផ្ទះ ឲ្យឪពុកម្ដាយក្មេក និងប្រពន្ធជាអ្នករកស៊ីចិញ្ចឹម ហើយមានពេលខ្លះវាយធ្វើបាបនាង និងធ្វើបាបគ្រួសារទៀតផង។ មានពេលខ្លះនាងនិងគ្រួសារត្រូវអត់បាយព្រោះបុរសជាប្ដីខឹងម្ហូបមិនឆ្ងាញ់ ក៏ជះបាយម្ហូបចោលទៀតផង។
នាងបានបន្តរៀបរាប់ទាំងទឹកភ្នែកថា មុនពេលកើតហេតុសម្លាប់កូននិងឪពុកនាង គឺកាលពីថ្ងៃទី២៩ ខែសីហា បុរសជាប្ដីរបស់នាងបានរំលោភម្ដាយបង្កើតនាង ហើយប៉ុនប៉ងសម្លាប់គាត់ តែមិនបានសម្រេច។ ពេលនោះម្ដាយនាងបានទៅប្ដឹងសមត្ថកិច្ចឃុំ តែសម្ថកិច្ចមិនបានចាប់ជនសង្ស័យជាប្ដីនាងផ្ដន្ទាទោសទេ ដោយសំអាងថាគ្មានភស្តុតាង។ ពេលនាងត្រឡប់មកពីធ្វើការរោងចក្រវិញ នាងបានដឹងរឿងក៏បានឈ្លោះប្រកែកជាមួយប្ដី ប្ដីនាងក៏បានយកកូនមកភ្នំពេញស្នាក់នៅជាមួយប្អូនថ្លៃនាង (ត្រូវជាប្អូនបង្កើតជនសង្ស័យ)។ លុះដល់ថ្ងៃទី២ ខែកញ្ញា ឆ្នាំ២០១៧ ប្ដីនាងបានសម្លាប់កូនស្រីខ្លួនចោលនៅម៉ោងប្រមាណ៩ព្រឹក ហើយបានធ្វើដំណើទៅស្វាយរៀង ទៅជួបឪពុកនាងកំពុងសម្រាកនៅមន្ទីរពេទ្យ។ ពេលទៅដល់ ប្ដីនាងបានទះស្មាឪពុកនាង រួចយកដៃខ្ទប់មាត់គាត់ជាប់ ហើយគ្រាទៅដល់បន្ទប់ទឹក ក៏ច្របាច់.ក គាត់ ជ្រមុជក្បាលចូលធុងទឹក ហើយដាក់គាត់លើចានបង្គន់ យកជើងធាក់គាត់ពីក្រោយខ្នងផ្ទប់នឹងចានបង្គន់ធ្វើឲ្យផតដើមទ្រូង និងបែកគ្រាប់ពោនស្លាប់។ រឿងនេះ ពេលដែលនាងចេញពីធ្វើការវិញម៉ោង៤និង២០នាទីទើបដឹង។ អ្នកស្រី ពេជ្រ សាខុន បានហៅអំពើនេះជាអំពើសាហាវយង់ឃ្នង នាងចង់តែកាប់ចិញ្ច្រាំឲ្យស្លាប់ទេ តែនាងសុំឲ្យសមត្ថកិច្ចផ្ដន្ទាទោសដាក់ពន្ធនាគារអស់មួយជីវិតចុះ។
យោងតាមឈ្មោះ យស ស៊ីវ៉ន ភេទប្រុសជាអ្នកជិតខាងភូមិផងរបងជាមួយដែលរួមដំណើជាមួយនាងមកភ្នំពេញបានឲ្យដឹងថា បុរសជាប្ដីរបស់អ្នកស្រី ពេជ្រ សាខុន ជាមនុស្សមានចរិតកាចសាហាវ ហើយគ្មានមុខរបររកស៊ីទេ គឺរស់នៅដោយសារប្រពន្ធចិញ្ចឹម ហើយដេកស៊ីស្រាប់ ហើយបានបង្ក្រាបគ្រួសារឲ្យខ្លបខ្លាចដោយអំពើកាចសាហាវរបស់ខ្លួន។ លោកបានបន្តទៀតថា គ្រួសារអ្នកស្រី សាខុន មានជីវភាពទ័លក្រណាស់ ផ្ទះជញ្ជាំងរហែក ដំបូលធ្លុុះឆ្លាយ នៅថ្ងៃធ្វើបុណ្យសពឪពុកនាង នៅក្នុងផ្ទះមានតែអង្ករមួយតៅ និងប្រាក់ បីម៉ឺនរៀលប៉ណ្ណោះ។ ចំណែកម្ដាយនាងក៏មានជំងឺទ្រុឌទ្រោមដោយសារតែកូនប្រសារធ្វើបាប។ និយាយរួមកូនប្រសារបានបំផ្លាញគ្រួសារនេះ។
ជាចុងក្រោយអ្នកស្រី ពេជ្រ សាខុន បានលើកដៃសំពះសូមឲ្យសប្បុរសជនជួយលើកទឹកចិត្តនាង និងជួយជាបច្ច័យខ្លះតាមកម្លាំងសទ្ធាជ្រះថ្លា ដើម្បីបានធ្វើបុណ្យឲ្យកូននិងឪពុកនាងបានសមរម្យផង។ អាស្រ័យហេតុនេះបើសប្បុរសជនមានសទ្ធាសូមទាក់ទងជួយអ្នកស្រីតាមរយៈទូរសព្ទលេខ 097-793-849-2។
សូមបញ្ជាក់ថា ជនល្មើស អង សំណាង ត្រូវសមត្ថកិច្ចចាប់ខ្លួនបាននៅវេលាម៉ោងប្រមាណ៦និង៣០នាទី ថ្ងៃទី៣ ខែកញ្ញា ឆ្នាំ២០១៧ នៅស្រុកគងពិសី ខេត្តកំពង់ស្ពឺ។ បច្ចុប្បន្នជនល្មើសត្រូវបានព្រះរាជអាជ្ញាចោទប្រកាន់ពីបទ «ឃាតកម្មគិតទុកជាមុន» ដែលប្រឈមនឹងការជាប់ពន្ធនាគារអស់មួយជីវិត ហើយត្រូវតុលាការសម្រេចឃុំខ្លួន។
