ក្រុងប៉េកាំង បានដាក់ពង្រាយប្រព័ន្ធកាំជ្រួចមីស៊ីល ការពារដែនអាកាស HQ-6 ដើម្បីចូលរួមសមយុទ្ធបាញ់គ្រាប់ពិតជាមួយកងទ័ពជើងទឹក ដែលផ្ដោតលើការការពារដែនអាកាស។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃពុធ ទី០៦ ខែកញ្ញា ឆ្នាំ២០១៧។
អនុប្រធានកងទ័ពអាកាសចិនលោក Ding Laihang បានប្រាប់ឲ្យដឹងថា កងវីរសេនាតូចការពារអាកាសចិន និងកងកម្លាំងមីស៊ីល បានធ្វើសមយុទ្ធបាញ់គ្រាប់ពិត នៅក្បែរឆ្នេរសមុទ្របូហៃ ភាគខាងកើតប្រទេសចិន កាលពីថ្ងៃអង្គារ ក្នុងគោលបំណងដើម្បីទប់ស្កាត់ការវាយប្រហារពីប្រទេសជិតខាង។
គួរបញ្ជាក់ផងដែរថា ក្រុងមូស្គូ និងក្រុងប៉េកាំង កំពុងផ្ដួចផ្ដើមគំនិតមួយ ដើម្បីបញ្ឈប់ការបាញ់បង្ហោះមីស៊ីល និងការសាកល្បងនុយក្លេអ៊ែររបស់កូរ៉េខាងជើង និងសមយុទ្ធយោធាទ្រង់ទ្រាយធំដោយទីក្រុងវ៉ាស៊ីនតោន និងក្រុងសេអ៊ូល៕
