មេបញ្ជាការកងទ័ពអាកាសអាមេរិក បានប្រាប់ឲ្យដឹងថា សហរដ្ឋអាមេរិក គ្រោងនឹងដាក់ពង្រាយយន្តហោះចម្បាំង F-35A និងអាកាសយានិកជាច្រើននាក់ ទៅកាន់ប្រទេសជប៉ុនកំឡុងពេលមានភាពតានតឹងកាន់តែខ្លាំងឡើងជាមួយកូរ៉េខាងជើង។ នេះបើយោងតាមគេហទំព័រសារព័ត៌មាន អង់គ្លេស (Express) បានចេញផ្សាយនារសៀលថ្ងៃអង្គារ ទី២៤ ខែតុលា ឆ្នាំ២០១៧។
មេបញ្ជាការកងទ័ពអាកាសអាមេរិកលោក Terrence O’Shaughnessy បាននិយាយថា យន្តហោះចម្បាំង F-35A ចំនួន១២គ្រឿង និងអាកាសយានិក ចំនួន៣០០នាក់មកពីមូលដ្ឋានទ័ពអាកាសអាមេរិក Kadena នឹងត្រូវដាក់ពង្រាយរយៈពេល ០៦ខែ ទៅកាន់ប្រទេសជប៉ុន នៅដើមខែក្រោយ។ លោក បានបន្តទៀតថា “យន្តហោះចម្បាំង F-35A នឹងចូលរួមជាមួយយន្តហោះយន្តហោះ F-35B ដែលត្រូវបានឈរជើងនៅមូលដ្ឋានទ័ពអាកាសជប៉ុន Iwakuni ចាប់តាំងពីខែមករាមកម្ល៉េះ”។
គួរបញ្ជាក់ផងដែរថា វត្តមានយោធាអាមេរិក មានការកើនឡើងនៅក្នុងប្រទេសជប៉ុន ដោយសារតែមានការគំរាមកំហែងថ្មីៗពីទីក្រុងព្យុងយ៉ាង និងជម្លោះពាក្យសំដី ដែលបណ្ដាលឲ្យភាពតានតឹងកាន់តែខ្លាំងឡើង ឬបង្កជាសង្គ្រាមលោកលើកទី០៣ កើតឡើងនាពេលឆាប់ៗនេះ៕
