អ្នកនាំពាក្យរដ្ឋាភិបាលក្រុង Catalonian បានប្រាប់ឲ្យដឹងថា អ្នកប្រឆាំងតវ៉ាច្រើនជាង ៨៤០នាក់ ទទួលរងរបួសយ៉ាងធ្ងន់ធ្ងរ ដោយសារមន្ត្រីប៉ូលិសទីក្រុងបាសេឡូណា ប្រទេសអេស្ប៉ាញ ប្រើអំពើហិង្សាគួរឲ្យខ្លាច និងអយុត្តិធម៌ អំឡុងពេលបោះឆ្នោត។ នេះបើយោងតាមគេហទំព័រសារព័ត៌មាន Sputnik បានចុះផ្សាយនាព្រឹកថ្ងៃច័ន្ទ ទី០២ ខែតុលា ឆ្នាំ២០១៧។
អ្នកនាំពាក្យរដ្ឋាភិបាលក្រុង Catalonianលោក Jordi Turull បាននិយាយថា កងកម្លាំងសន្តិសុខអេស្ប៉ាញ បានបាញ់គ្រាប់កាំភ្លើងកៅស៊ូ និងដំបងឆក់ ទៅលើអ្នកប្រឆាំងតវ៉ាជាច្រើនរយនាក់ ដែលមកជួបជុំគ្នាដោយសន្តិវិធី នៅក្នុងទីក្រុង បាសេឡូណា ព្រមទាំងមនុស្សចាស់ដែលអង្គុយនៅលើដីទទួលរងរបួសយ៉ាងធ្ងន់ធ្ងរ ការពីម្សិលមិញនេះ។
ជុំវិញបញ្ហានេះ លោក Turull បានកត់សម្គាល់ថា អំពើហិង្សាខាងលើនេះ គឺជាការទទួលខុសត្រូវផ្ទាល់របស់នាយករដ្ឋមន្ត្រីអេស្ប៉ាញលោក Mariano Rajoy និងរដ្ឋមន្ត្រីការពារជាតិលោក Juan Ignacio Zoido ហើយបានអំពាវនាវឲ្យ អ្នកទាំងពីរ លាលែងពីតំណែង ថែមទៀតផង នេះបើយោងតាមគេហទំព័រ APnews.com៕
