នាវាផ្ទុកយន្តហោះអាមេរិក ចំនួន០២គ្រឿង បានមកដល់តំបន់សមុទ្រប៉ាស៊ីហ្វិក កាលពីរថ្ងៃមុន ដោយចូលរួមជាមួយនាវាចម្បាំង ចំនួន០៣គ្រឿងថែមទៀត សម្រាប់ទុកការពារដំណើរទស្សនកិច្ច លោក ដូណាល់ ត្រាំ នៅដើមខែក្រោយ។ នេះបើយោងតាមគេហទំព័រសារព័ត៌មាន CNN បានចុះផ្សាយនារសៀលថ្ងៃពុធ ទី២៥ ខែតុលា ឆ្នាំ២០១៧។
នាវាផ្ទុកយន្តហោះអាមេរិកម៉ាក USS Theodore Roosevelt, USS Nimitz នាវាតាមដាន, នាវាចម្បាំង និងនាវាមុជទឹក មកពីកងនាវាចរណ៍លេខ០៧ ដែលមានមូលដ្ឋាននៅប្រទេសជប៉ុន ហើយធ្វើការតាមដានពីភាគខាងកើតមហាសមុទ្រឥណ្ឌា រហូតដល់មហាសមុទ្រប៉ាស៊ីហ្វិក និងបានចូលរួមធ្វើសមយុទ្ធជាមួយកងកម្លាំងកូរ៉េខាងត្បូង កាលពីសប្ដាហ៍មុន។
គួរបញ្ជាក់ផងដែរថា ការធ្វើសមយុទ្ធទាំងនោះ បានទទួលរងការរិះគន់យ៉ាងខ្លាំងពីកូរ៉េខាងជើង ដែលមើលឃើញថា សហរដ្ឋអាមេរិក និងសម្ព័ន្ធមិត្ត កំពុងតែហាត់សមសម្រាប់ការវាយប្រហារទៅលើទីក្រុងព្យុងយ៉ាង ក្នុងពេលឆាប់ៗនេះ៕
