ភ្នំពេញៈ ស្ទើរមិនគួរឲ្យជឿផលិតកម្មល្បីមួយ ដែលតែងតែនាំភាពរីករាយក្នុងពិភពកុនខ្មែរបានសម្រេចចិត្តបញ្ចប់ការថតកុនខ្មែរ ក្រោយស្លុតនឹងដំណឹងកាត់ពន្ធខ្លាំងស្ទើរតែដួលសន្លប់។ទោះបីមិនចង់លាលែង តែទំហំការចំណាយខ្លាំងពេក មានតែដើរចេញទាំងរលីងរលោងទឹកភ្នែកទីកន្លែង ដែលពេញចិត្ត។
អ្នកគាំទ្រស្នាដៃផលិតភាពយន្ត របស់ផលិតកម្មឥន្ទ្រានិម្មិត បានភ្ញាក់ផ្អើលខ្លាំង ក្រោយពីអ្នកនិពន្ធ និងដឹកនាំរឿងរបស់ផលិតកម្មនេះ បានប្រកាសថា រឿង “សសរកន្លោង” ដែលកំពុងទាក់ទាញការចាប់អារម្មណ៍ខ្លាំងនោះ នឹងក្លាយជាស្នាដៃចុងក្រោយ។ ជាស្នាដៃចុងក្រោយព្រោះតែផលិតកម្មនេះ ប្រកាសបិទទ្វារបញ្ចប់ការផលិតភាពយន្ត ដោយសារតែផលិតកម្មមិនមានលទ្ធភាពបង់ពន្ធជូនរដ្ឋ តាមការប្រកាសរបស់ក្រសួង ពាក់ព័ន្ធកាលពីថ្មីៗនេះ។
ផលិតករ សិល្បករជាច្រើន និងអ្នករកស៊ីពាក់ព័ន្ធ នឹងវិស័យភាពយន្តកំពុងជ្រួលច្របល់ និងខ្វាយខ្វល់ខ្លាំង ក្រោយពីក្រសួងវប្បធម៌ បានកោះប្រជុំផលិតករផ្សព្វផ្សាយស្តីពីគោលការ នៃការប្រមូលពន្ធច្រើនលើសលប់ ពីផលិតករ សិល្បករ និងក្រុមការងារផលិតភាពយន្តនោះ។
ថ្លែងលើគណនីហ្វេសប៊ុក របស់ខ្លួនលោក ចាន់ណា រ៉ូណាន់ ដែលគេស្គាល់ថា ជាផលិតករវ័យក្មេងល្បីឈ្មោះ បានបញ្ជាក់ថា “ខ្សែភាពយន្តរឿង “សសរកន្លោង” ជារឿងទី២ និងជារឿងចុងក្រោយ របស់ផលិតកម្មឥន្ទ្រានិម្មិត បន្ទាប់ពីនាយកដ្ឋានពន្ធដារ និងក្រសួងវប្បធម៌ ប្រកាសឲ្យបង់ពន្ធចូលរដ្ឋ ច្រើនហួសពីលទ្ធភាព នៃប្រាក់ចំណូលដែលទទួលបាន ពីការផលិតកុន ដូចនេះខ្ញុំសម្រេចចិត្តបិទទ្វារ ឈប់ផលិតខ្សែភាពយន្ត បន្ទាប់បើរដ្ឋចាប់អនុវត្តលើពន្ធដារ”។
ថ្លែងបញ្ជាក់បន្ថែមលើនេះ លោកទទួលស្គាល់ថា ពិតជាមានបំណងបិទទ្វារបញ្ចប់ ការផលិតភាពយន្តពិតមែន ប្រសិនបើក្រសួងពាក់ព័ន្ធអនុវត្ត តាមការប្រកាសនោះមែន។ លោកថា ដោយក្តីស្រលាញ់វិស័យសិល្បៈ និងចង់បង្កើតស្នាដៃថ្មី សម្រាប់អ្នកគាំទ្រ លោកបានសម្រេចចិត្តប្រមូលអស់ទ្រព្យធន ដែលមានជាមួយបងប្អូន បើកដំណើរការទាំងការប្រឹងប្រែងខ្លាំង ប៉ុន្តែពេលនេះលោកនិងក្រុមការងារ បែរជាបាក់ទឹកចិត្តខ្លាំង ក្រោយពីទទួលដំណឹង នៃការប្រកាសទារពន្ធជាច្រើន សន្ធឹកសន្ទាប់ពីរដ្ឋ គឺគ្រប់ផ្នែក។
លោកថាផលិតកម្មខ្លះ ស្ទើត្រដខ្សល់រៀបនឹងបិទចោល ព្រោះមិនអាចរកចំណូលទ្រទ្រង់បានផង ស្រាប់តែជួបនឹងបញ្ហាប្រឈមពេលនេះទៀត ទាំងពន្ធលើចំណូលពីការលក់សំបុត្រ ពន្ធពីចំណូលប្រចាំខែ ប្រចាំឆ្នាំ ពន្ធលើការជួលទីតាំងថត ការិយាល័យ ពីបុគ្គលិក ពីអ្នកនិពន្ធ អ្នកដឹកនាំ សិល្បករ ជាដើម។
