សមាជិកសភាកូរ៉េខាងត្បូង បានប្រាប់ឲ្យដឹងថា ក្រុមចារកម្មកូរ៉េខាងជើង ត្រូវបានគេចោទប្រកាន់ ទាក់ទងការលួចឯកសារយោធា និងទិន្នន័យក្រសួងការពារជាតិកូរ៉េខាងត្បូង កាលពីខែកញ្ញា ឆ្នាំ២០១៦។ នេះបើយោងតាមគេហទំព័រសារព័ត៌មាន CNN បានចុះផ្សាយនាយប់ថ្ងៃអង្គារ ទី១០ ខែតុលា ឆ្នាំ២០១៧។
សមាជិកសភាកូរ៉េខាងត្បូងលោក Rhee Cheol-hee ដែលជាសមាជិកគណបក្សប្រជាធិបតេយ្យកំពុងកាន់អំណាច និងជាសមាជិកគណៈកម្មាធិការការពារជាតិ បានប្រាប់ទូរទស្សន៍ CNN ថា លោក បានទទួលព័ត៌មានអំពីការលួចបន្លំឯកសារយោធា និងទិន្នន័យក្រសួងការពារជាតិ ពីទីក្រុងព្យុងយ៉ាង។ លោក បានបន្ថែមទៀតថា ទិន្នន័យយោធា ដែលមានប្រហែលជា ២៣៥ជីហ្គាបៃ ត្រូវបានលួចដោយពួក Hacker (កូរ៉េខាងជើង)។
ទន្ទឹមនឹងនេះ មន្ទីរបញ្ចកោណ ក៏បានបដិសេធមិនធ្វើអត្ថាធិប្បាយជាក់លាក់លើរបាយការណ៍ នៃការរំលោភបំពាន នោះទេ ប៉ុន្តែអ្នកនាំពាក្យក្រសួងការពារជាតិអាមេរិកលោក Col. Robert Manning បាននិយាយថា “សហរដ្ឋអាមេរិក មានទំនុកចិត្តលើសុវត្ថិភាពនៃផែនការប្រតិបត្តិការរបស់យើង និងសមត្ថភាពក្នុងការដោះស្រាយនូវការគំរាមកំហែងណាមួយពីកូរ៉េខាងជើង”៕
