មន្ត្រីយោធាជាន់ខ្ពស់អាមេរិក បានប្រាប់ឲ្យដឹងថា សហរដ្ឋអាមេរិក កំពុងបង្កើតរថយន្តសមត្ថភាពបាញ់មីស៊ីលសេរីថ្មី តូចជាងរថយន្ត Humvee ហើយអាចដឹកជញ្ជូនតាមឧទ្ធម្ភាគចក្រម៉ាក MV-22 Ospreys និង CH-53K King Stallions បានថែមទៀតផង។ នេះបើយោងតាមគេហទំព័រសារព័ត៌មាន Sputnik បានចុះផ្សាយនាព្រឹកថ្ងៃសៅ ទី២៨ ខែតុលា ឆ្នាំ២០១៧។
មន្ត្រីយោធាជាន់ខ្ពស់អាមេរិកលោក David Coffman បាននិយាយថា ក្រសួងការពារជាតិសហរដ្ឋអាមេរិក កំពុងបង្កើតរថយន្តសមត្ថភាពបាញ់មីស៊ីលសេរីថ្មី ដែលដឹកជញ្ជូនតាមរយៈឧទ្ធម្ភាគចក្រMV-22 Ospreys និង CH-53K King Stallions នឹងត្រៀមដាក់អោយដំណើរការ នៅឆ្នាំ២០១៨។ លោក បានបន្ថែមទៀតថា រថយន្តនេះ អាចដាក់ប្រព័ន្ធមីស៊ីល Fletcher មានសមត្ថភាពបាញ់បង្ហោះចំគោលដៅ រយៈចម្ងាយ ៧០គីឡូម៉ែត្រ។
គួរបញ្ជាក់ផងដែរថា កាលពីថ្ងៃអាទិត្យសប្ដាហ៍មុន កងម៉ារីនអាមេរិក បានសាកល្បងបាញ់ប្រព័ន្ធកាំជ្រួចមីស៊ីល HIMARS ពីលើនាវាដឹកជញ្ជូនមួយឈ្មោះថា USS Anchorage ជាលើកដំបូង ដែលពីមុនមិនដែរធ្លាប់មាន៕
