ករណីចោរឆក់ ឃើញសង្កេតឃើញថាមានកើតឡើងរៀងរាល់ថ្ងៃ បើទោះបីជាសមត្ថកិច្ចមានការសកម្មយ៉ាងណាក៍ដោយ គឺក្រុមទាំងនោះហាក់ដូចជាមិនខ្លាចសោះ ហើយករណីខ្លះទៀតបណ្ដាលឲ្យជនរងគ្រោះ បាត់បង់ជីវិតទៀតផង។
ដោយមើលឃើញនូវភាពខ្វះខាត ត្រង់ចំណុចនេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានជម្រុញឲ្យដាក់ពាក្យបណ្តឹងប្តឹង ចោរឆក់ តាមផ្លូវសាធារណៈពីបទប៉ុនប៉ងមនុស្សឃាតមួយកម្រិតទៀត ខណៈការអនុវត្តកន្លងទៅមានទោសតិចតួចដែលជាកត្តាធ្វើឲ្យជនល្មើសបានចិត្តនិងធ្វើសកម្មភាពបែបនេះដដែលជាដដែលនោះ។ ដោយបានលើកឡើងថា ៖
ចោរឆក់ គួរតែត្រូវបានចោទពីបទ «ប៉ុនប៉ងមនុស្សឃាត» មួយបន្ថែមទៀត ក្រៅតែពីការដាក់ទោស ពាក់ព័ន្ធនឹងការឆក់។
ការស្នើឡើងយ៉ាងដូច្នេះ ក្នុងកិច្ចប្រជុំជាមួយស្នងការរាជធានី-ខេត្ត នៅទូទាំងប្រទេស រួមទាំងភាគីផ្សេងៗទៀត ដែលប្រព្រឹត្តទៅនៅព្រឹកថ្ងៃទី១៨ ខែតុលា ឆ្នាំ២០១៧នេះ។
ជាមួយគ្នានោះដែរ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក៏បានប្រាប់ដល់អង្គភាពទាំងអស់ត្រូវត្រៀមកម្លាំងឲ្យបានគ្រប់ពេល និងគ្រប់គោលដៅក្នុងគោលបំណងទប់ស្កាត់នូវសកម្មភាពណាដែលធ្វើឲ្យប៉ះពាល់ដល់សន្តិសុខសង្គម និងសន្តិភាពជាដើមនោះ។
ដោយឡែកសម្រាប់ព្រះរាជពិធីបុណ្យអុំទូក បណ្តែតប្រទីព សំពះព្រះខែ នាពេលខាងមុខនេះ អគ្គស្នងការនគរបាលជាតិ ក៏បានត្រៀមកម្លាំងចំនួនជិតបីម៉ឺននាក់ ដើម្បីការពារ និងរក្សាសន្តិសុខជូនដល់បងប្អូនប្រជាពលរដ្ឋក៏ដូចជាភ្ញៀវទេសចរណ៍ជាតិ និងអន្តរជាតិផងដែរ ៕
