ក្រុមហ៊ុន Facebook បានប្រាប់ឲ្យដឹងថា ប្រជាជនអាមេរិកច្រើនជាង ១២៦លាននាក់ ទទួលបានព័ត៌មាន ឬមាតិកាបោកប្រាស ដែលបង្ហោះ ដោយភ្នាក់ងារសម្ងាត់រុស្ស៊ី មានមូលដ្ឋាននៅក្នុងប្រទេសរុស្ស៊ី ផ្ទាល់ ក្នុងរយៈពេល០២ឆ្នាំចុងក្រោយ។ នេះយោងតាមគេហទំព័រសារព័ត៌មាន BBC បានចុះផ្សាយនាព្រឹកថ្ងៃអង្គារ ទី៣១ ខែតុលា ឆ្នាំ២០១៧។
ក្រុមហ៊ុន Facebook បាននិយាយថា ព័ត៌មាន ឬមាតិការហូតដល់ ៨ម៉ឺនលើក ត្រូវបានបង្ហោះមុន និងបន្ទាប់ពីការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦ ហើយក្នុងចំណោមមាតិកាទាំងនេះ ភាគច្រើនផ្ដោតសំខាន់ទៅលើសារសង្គម និងនយោបាយ។ ម្យ៉ាងវិញទៀត ក្រុមហ៊ុននេះ បានចេញផ្សាយតួលេខ នៅមុនពេលព្រឹទ្ធសភាអាមេរិក នឹងធ្វើសវនកម្មទាក់ទងនឹងសំណុំរឿងនេះ ជាមួយក្រុមហ៊ុន Twitter និង Google ដើម្បីបញ្ជាក់ថា រុស្ស៊ីបានបង្កផលប៉ះពាល់ដល់បណ្ដាញសង្គម ដ៏មានប្រជាប្រិយភាពទាំងពីរនេះ។
នៅថ្ងៃច័ន្ទម្សិលមិញ Google ក៏បានបង្ហាញផងដែរថា វីដេអូជាង ១ពាន់ ត្រូវបានបង្ហោះនៅលើ YouTube តាមគណនីចំនួន ១៨ខុសៗគ្នា និង Twitter បានរកឃើញ ព្រមទាំងផ្អាកគណនី ២.៧៥២ នាក់ ដែលត្រូវបានតាមដាន ដោយទីភ្នាក់ងារស្រាវជ្រាវអ៊ីនធឺណិត ថា គឺជាក្រុមហ៊ុនរុស្ស៊ី។
ជុំវិញការចោទប្រកាន់ខាងលើនេះ ប្រទេសរុស្ស៊ី បានបដិសេធម្ដងហើយម្ដងទៀត នូវការចោទប្រកាន់ថា ខ្លួនបានព្យាយាមធ្វើឲ្យមានឥទ្ធិពលលើការបោះឆ្នោត ប្រធានាធិបតីអាមេរិកចុងក្រោយ ដែលក្នុងនោះលោក ដូណាល់ ត្រាំ បានផ្ដួលភាគីលោកស្រី ហ៊ីលឡារី គ្លីនតុន។
គួរបញ្ជាក់ផងដែរថា មាតិកាបោកប្រាសខាងលើនេះ ត្រូវបានបង្ហោះ នៅចន្លោះពីខែមិថុនា ឆ្នាំ២០១៥ រហូតដល់ខែសីហា ឆ្នាំ២០១៧ ហើយ Facebook ថែមទាំងបញ្ជាក់ទៀតថា នៅពីក្រោយការ បង្ហោះព័ត៌មាន ចំនួនច្រើននេះ គឺក្រុមហ៊ុនរុស្ស៊ីមួយ មានទំនាក់ទំនងនឹងវិមានក្រឹមឡាំង៕
