ប្រទេសកូរ៉េខាងត្បូង និងចិន បានព្រមព្រៀងគ្នាធ្វើការផ្សះផ្សាចំណងមិត្តភាព ក្រោយពីបានអូសបន្លាយរយៈពេលមួយឆ្នាំ រឿងការដាក់ពង្រាយប្រព័ន្ធការពារមីស៊ីលអាមេរិក នៅកូរ៉េខាងត្បូង។ នេះបើយោងតាមគេហទំព័រសារព័ត៌មាន Sputnik បានចុះផ្សាយនារសៀលថ្ងៃអង្គារ ទី៣១ ខែតុលា ឆ្នាំ២០១៧។
ក្រសួងការបរទេសកូរ៉េខាងត្បូង បានប្រាប់ឲ្យដឹងថា ទំនាក់ទំនងរវាងប្រទេសទាំងពីរ ត្រូវបានធ្លាក់ចុះបន្ទាប់ពីការដាក់ពង្រាយប្រព័ន្ធការពារមីស៊ីលអាមេរិក (THAAD) ដើម្បីការពារពីការគំរាមកំហែងពីសំណាក់ប្រទេសកូរ៉េខាងជើង នាពេលកន្លងមក។ ក្រសួង បានបន្ថែមទៀតថា “ភាគីទាំងពីរ បានចែករំលែកទស្សនៈថា ការពង្រឹងការផ្លាស់ប្ដូរ និងកិច្ចសហប្រតិបត្តិការរវាងកូរ៉េ និងចិន បានផ្ដល់ផលប្រយោជន៍រួមគ្នា ព្រមទាំងផ្លាស់ប្ដូរការអភិវឌ្ឍយ៉ាងឆាប់រហ័សថែមទៀតផង”។
សេចក្ដីព្រមព្រៀងនេះ បានធ្វើឡើងបន្ទាប់ពីកិច្ចប្រជុំកំពូលរវាងជំនួយការរដ្ឋមន្ត្រីការបរទេសចិនលោក Kong Xuanyou និងអនុប្រធាន ការពារជាតិកូរ៉េខាងត្បូងលោក Nam Gwan-pyo នាពេលថ្មីៗនេះ។
គួរបញ្ជាក់ផងដែរថា ប្រធានាធិបតីកូរ៉េខាងត្បូង លោក Moon Jae-in បាននិយាយថា ខ្ញុំនឹងជួបជាមួយមេដឹកនាំកំពូលចិនលោក ស៊ី ជីនពីង ក្រោយវេទិកានៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅថ្ងៃទី១០-១១ ខែវិច្ឆិកា ខាងមុខនេះ៕
