ភ្នំពេញៈ លោក រ៉ូ ប៊ីនណៃ ជាមេធាវីការពារក្ដីឲ្យកញ្ញា នី មុនីនាថ លើបណ្ដឹងឆបោកពីសំណាក់អតីតគូដណ្ដឹងលោ អ៊ឹង សូឡាង រំពឹងកូនក្ដីរបស់លោកនឹងឈ្នះក្ដី ហើយទទួលបានភាពយុត្តធម៌ចំពោះបណ្ដឹងនេះ ដែលតុលាការគ្រោងកោះហៅបំភ្លឺនៅថ្ងៃទី២២ ខែវិច្ឆិកា ខាងមុខ។
លោកមេធាវីអះអាងដូច្នេះ ដោយសារលោកមានភស្តុតាងគ្រប់គ្រាន់ អាចបញ្ជាក់បានថា កូនក្ដីខ្លួន មិនបានឆបោកដូចការចោទប្រកាន់ពីសំណក់អតីតគូដណ្ដឹងលោក អ៊ឹង សូឡាង នោះទេ។ មេធារីរូបនេះ អះអាងទៀតថា កូនក្ដីរបស់លោកមានតែរងភាពអាម៉ាស់ និងក្លាយជាមេម៉ាយឥតខាន់ស្លាទៅវិញ ចំពោះបណ្ដឹងនេះ ព្រោះបានធ្វើឱ្យប៉ះពាល់ដល់ជីវភាពប្រចាំថ្ងៃ ក៏ដូចជាកេរ្តិ៍ឈ្មោះនៅក្នុងសង្គម។
ចំពោះពាក្យបណ្ដឹងពីសំណាក់លោក អ៊ឹង សូឡាង ដែលប្ដឹងទាមទារសំណងពីកូនក្ដីរបស់លោករហូតដល់១២ម៉ឺនដុល្លារនោះ គឺជារឿងមួយមិនអាចទៅរួច។
យ៉ាងណាលោកមេធាវី រ៉ូ ប៊ីនណៃ ទទួលស្គាល់ថា រយៈពេល៤ឆ្នាំ ក្នុងនាមជាគូដណ្ដឹងពិតជាមានភាពផ្ដល់ឱ្យគ្នាតិចតួចរឿងលុយកាក់នេះ តែមិនដល់ថ្នាក់ជាង១២ម៉ឺនដុល្លារដូចការចោទនោះឡើយ៕
