ភ្នំពេញៈ សពក្មេងស្រីអាយុប្រហែលជាង១ខួប ត្រូវបានប្រជាពលរដ្ឋប្រទះឃើញអណ្ដែតទឹកទន្លេចតុមុខ បន្ទាប់ពីម្ដាយឪពុកបងប្អូនដើររកអស់រយៈពេលបីថ្ងៃទើបមករកឃើញ។
ហេតុការណ៍ភ្ញាក់ផ្អើលខាងលើកើតហេតុនៅវេលាម៉ោង៩និង៣០នាទីព្រឹកថ្ងៃទី៩ ខែវិច្ឆិកា ឆ្នាំ២០១៧ នៅត្រង់ចំណុចកំពង់ចម្លងភ្នំពេញ អរិយក្សត្រ សង្កាត់ចតុមុខ ខណ្ឌដូនពេញ ។
អ្នកឃើញហេតុការណ៍ បានឲ្យដឹងថា មុនពេលកើតហេតុ គឺមានសិស្សសាលាមួយក្រុម ដែលទើបចេញកន្លែងប្រារព្ធពិធីបុណ្យឯករាជ្យជាតិ ក៏ប្រទះឃើញមានអីអណ្ដែតទឹក ក៏នាំគ្នាស្រងមកលើគោក ក៏ឃើញសពកូនក្មេងស្រីអណ្ដែតទឹកទន្លេ ក៏នាំគ្នារត់ដោយទុកសពចោលរួចរត់ទៅប្ដឹងសមត្ថកិច្ច។
ក្រោយពីសមត្ថកិច្ចមកដល់កន្លែងកើតហេតុចុះត្រួតពិនិត្យ ស្រាប់តែឃើញជនជាតិវៀតណាមបួននាក់កំពុងជិះកាណូតពីរគ្រឿងដើររកកូនស្រីធ្លាក់ទឹកកាលពីបីថ្ងៃមុន សមត្ថកិច្ចបានហៅឲ្យចូលមកមើលក៏ឃើញពិតជាកូនរបស់ខ្លួនមែន។
ប្រភពព័ត៌មានពីសមត្ថកិច្ច បានឲ្យដឹងថា ឪពុកសពឈ្មោះ ឡេ យ៉ាំងជី អាយុ២៩ ឆ្នាំ មុខរបរនេសាទ ស្នាក់នៅលើបែល សង្កាត់ព្រែកព្នៅ ខណ្ឌព្រែកព្នៅ ចំណែកប្រពន្ធឈ្មោះ វៀង ត្រេគុក អាយុ២៤ ឆ្នាំ មុខរបរវ៉ៃប្រហិត ស្នាក់នៅជាមួយប្ដី ។
ឪពុកសពបានប្រាប់ឲ្យដឹងថា សពមានឈ្មោះ ឡេ យ៉ាំងឡង់ ភេទស្រី អាយុ២ ឆ្នាំ ជាកូនស្រីទី២ ដែលថ្ងៃកើតហេតុនោះ គឺបីថ្ងៃមុនកូនស្រីរបស់គាត់បានលេងទឹកស្រាប់តែធ្លាក់ចូលទឹកភ្លាមៗនោះខ្លួនគាត់ចុះច្រមុជទឹករុករកដែរ តែមិនឃើញក៏ប្រឹងជិះកាណូតរកគ្រប់ទីកន្លែង។
ក្រោយពីការកោសល្យវិច្ឆ័យរួចសពត្រូវបានប្រគល់អោយឪពុកដឹកយកទៅធ្វើបុណ្យតាមប្រពៃណី៕
