ថ្ងៃចន្ទ ទី២៧ ខែវិច្ឆិកា ឆ្នាំ២០១៧ គណៈកម្មាធិការអចិន្ត្រៃយ៍រដ្ឋសភា នឹងបើកសម័យប្រជុំពេញអង្គ ដើម្បីប្រកាសផ្តល់ សុពលភាពដល់តំណាងរាស្ត្រថ្មី។ អាសនៈ៥៥របស់អតីគណបក្សសង្គ្រោះជាតិដែលប្រជាពលរដ្ឋបានបោះឆ្នោតគាំទ្រកាលពីឆ្នាំ២០១៣ ត្រូវបានគណៈកម្មាធិការជាតិរៀបចំការបោះឆ្នោតបែងចែកទៅឱ្យគណបក្ស៥។
ក្រោយរដ្ឋសភាប្រកាសសុពលភាព អ្នកតំណាងរាស្ត្រថ្មីនឹងត្រូវទៅស្បថនៅក្នុងព្រះបរមរាជវាំង ទើបក្លាយជាអ្នកតំណាងរាស្ត្រពេញសិទ្ធិ។ គណបក្សទាំង៥ដែលគ.ជ.ប បែងចែកអាសនៈរបស់អតីតបក្សប្រឆាំងរួមមាន៖
១. គណបក្សហ៊្វុនស៊ិនប៉ិច ទទួលបាន ៤១អាសនៈ
២. គណបក្សសញ្ជាតិកម្ពុជាទទួលបាន ២អាសនៈ
៣. គណបក្សខ្មែរអភិវឌ្ឍន៍សេដ្ឋកិច្ច ១អាសនៈ
៤. គណបក្សខ្មែរឈប់ក្រ ៥អាសនៈ
៥. គណបក្សសម្ព័ន្ធដើម្បីប្រជាធិបតេយ្យ ៦អាសនៈ
កាលពីថ្ងៃទី២៤ ខែវិច្ឆិកា អតីតគណបក្សសង្គ្រោះជាតិថ្កោលទោសយ៉ាងដាច់អហង្ការចំពោះគណៈកម្មាធិការជាតិរៀបចំការបោះឆ្នោត ដែលបានរឹបអូសអាសនៈរដ្ឋសភារបស់គណបក្សសង្គ្រោះជាតិទៅចែកឱ្យគណបក្សដទៃ។
