ភ្នំពេញៈ តារាចម្រៀង និងតារាសម្តែងប្រុស លោក ឌី យ៉ាម៉ង់ និងលោក ខេ(K) បានរួមគ្នាបង្កើតក្រុមតារាចម្រៀងថ្មីមួយ មានឈ្មោះថា ធីអឹម(TM)។ ការបង្កើតក្រុមថ្មីនេះ ក្រោយពីក្រុមសមាជិកក្រុមចម្រៀងចាស់ De5inite បានបែកគ្នាអស់ ហើយក្រុមថ្មីនេះ ក៏នឹងបញ្ចេញស្នាដៃថ្មី ប្លែកពីបទចម្រៀងពីមុនផងដែរ។
លោក ខេ ថាបទចម្រៀងថ្មីនេះ នឹងប្លែកពីបទដទៃ ព្រោះតែលោកនឹងដកស្រង់អត្ថន័យ នៃរឿងក្នុងអក្សរសិល្ប៍បុរាណ របស់ខ្មែរជាច្រើន មកនិពន្ធជាបទចម្រៀងថ្មី សម្រាប់បង្ហាញដល់យុវជនជំនាន់ក្រោយ ឲ្យបានយល់និងបានស្គាល់ពីអក្សរសិល្ប៍ខ្មែរដែលជាអត្តសញ្ញាណជាតិខ្លួន។ ក្រៅពីអត្ថន័យ ក្រុមលោកក៏បានបង្កើតឲ្យមានទស្សនីយភាពថ្មីប្លែកនៃការសម្តែងដែរ គឺការសម្តែងជាតួអង្គ គ្រងសំលៀកបំពាក់បែបល្ខោនខោល និងល្ខោនបាសាក់ជាដើម។
លោក K បានបង្ហាញអារម្មណ៍សប្បាយរីករាយខ្លាំង ក្រោយពេលលោកបានរួមគ្នាជាមួយ ឌី យ៉ាម៉ង់ ដើម្បីបង្កើតក្រុមថ្មី ជាមួយស្នាដៃថ្មីប្លែក។ លោកថា បទចម្រៀងថ្មីនេះ នឹងបង្កប់នូវទស្សនៈអប់រំ ជាមួយនឹងទស្សនីយភាពថ្មីប្លែក សម្រាប់បម្រើការកម្សាន្ត របស់ទស្សនិកជន។ លោកថា លោក នៅតែខិតខំប្រឹងប្រែងខ្លាំង ដើម្បីបង្កើតស្នាដៃបទចម្រៀងថ្មី សម្រាប់បម្រើការកម្សាន្ត របស់ទស្សនិកជន។ លោក រំពឹងដែរថា ស្នាដៃថ្មីដែលបង្កើត ដោយកូនខ្មែរ នឹងទទួលបានការគាំទ្រច្រើន ពីទស្សនិកជន។
ក្រុមលោកបាននិពន្ធបទចម្រៀងថ្មី Original Song ភ្លាមៗគឺបទ ”កំហុសរាម” ដែលនិយាយអំពីកំហុសរបស់ព្រះរាម ដែលមិនទុកចិត្តមហេសី នាងសីតា ហើយទើបនឹងចេញជា MV កាលពីថ្មីៗនេះដែរ។ ក្រៅពីនេះលោកក៏ត្រៀមបទចម្រៀងថ្មី ជាច្រើនបទបន្តទៀតផងដែរ ដូចជាបទ ”ក្រដាស ស” និងបទ ”រ៉ូប ស”៕
Full MV បទ “កំហុសរាម”
