ភ្នំពេញៈ ដោយសារតែការចេញព័ត៌មាននៅលើវេបសាយមួយ ដែលគេស្គាល់ថា ជារបស់ ចន ច័ន្ទ និងលោក ហេង ឡុង ស្តីពីប្រធានបទអ្នកនាង ម៉េង កែវពេជ្ជតា រឿងប្រាក់រៀល បានក្លាយជារឿងផ្ទុះពាក្យសំដីចំពោះ ម៉េង កែវពេជ្ជតា ហើយអ្នកនាងបានប្រតិកម្មបកវិញយ៉ាងចាស់ដៃ។
ខាងក្រោមនេះ គឺជាខ្លឹមសារទាំងស្រុង ដែលកំពូលតារាចម្រៀងដែលអ្នកនាង ម៉េង កែវពេជ្ជតា បានសរសេរថា៖
«សូមអធ្យាស្រ័យជួយអានឲ្យចប់ ទើបដឹងសាច់រឿងចុងក្រោយ មុនឲ្យមហាជនរិះគន់ពិភពសិល្បៈថា រញ៉េរញ៉ៃម្តេចបាន បើសូម្បីតែប្រធានសមាគមសិល្បៈ ក៏តាមបំផ្លាញអ្នកសិល្បៈគ្នាឯងដែរ (sic) ដើរឈ្លោះស្ទើរមួយប្រទេស។ មានតែអញ។ លូកដៃតាំងពីរឿងកំប៉ិចកំប៉ុករហូតដល់រឿងនយោបាយខុសជំនាញ។ ផ្អែមក្រៅដំបៅក្នុង ជំនាញចាក់រុកបង្កើតបក្ខពួកនិយម គ្មានគំនិតបង្រួបបង្រួមក្នុងនាមខ្លួនជាប្រធានសោះ យកចរិតនៅផ្ទះមកដឹកនាំ មិនដែលថា ខ្លួនឯងខុសម្តង គ្មានទំនួលខុសត្រូវ ខឹងគេនិយាយចំចំណុចមិនតបនឹងមុខទេ រត់ទៅកៀងគរបក្ខពួកឲ្យជួយជេរពីចម្ងាយ និងខំកាយយករឿងផ្សេងទាំងមិនពិតមកបញ្ឈឺ។ អសីលធម៌ជេរបញ្ចោរយកតែឈ្នះ ហើយថ្មីៗនេះ ទើបតែជេរប៉ះដល់សិទ្ធិបុគ្គលប្តីប្រពន្ធអ្នកមានឋានៈកំពូល វិះតែនឹងបានជាប់ខ្នោះជាប់គុកច្រវ៉ាក់ទៅហើយ បើកុំតែរត់ទៅលុតជង្គង់ទាំងភ្នែកនៅកញ្ចឹងករ ក្រាបសំពះសូមទោសគេទាន់។
ខ្លឹមសារដដែល បានបន្តថា សរុបទៅអ្វីដែលគាត់ធ្វើសុទ្ធតែជារឿងគ្មានប្រយោជន៍អ្វីប៉ុនចុងក្រចកដល់សង្គម និងសិល្បៈសោះ ផ្ទុយទៅវិញបានត្រឹមតែធ្វើឲ្យពិភពសិល្បៈជួបតែភាពថោកទាបឆ្អាបស្អុយ អត់តម្លៃអាចឈានទៅរកការអស់ជំនឿ និងរលត់រលាយកេរ្តិ៍ឈ្មោះសមាគមសិល្បៈនៅអនាគត ដ៏ខ្លីខាងមុខប៉ុណ្ណោះ។ តើចរិតអ្នកដឹកនាំសិល្បៈគេធ្វើដូចឬ? ឥឡូវគាត់ងាកមកបំផ្លាញខ្ញុំទៀតហើយ។ ជួយគិតមើលបងប្អូន ខ្ញុំនិយាយតែខ្ញុំ ឆ្ងល់រឿងលុយជារឿងធម្មតាអត់ប៉ះពាល់ដល់នរណាសោះ ស្រាប់តែគាត់មកលាបពណ៌ឲ្យខ្ញុំទៅជារឿងផ្សេងឯណាឆ្កុយ។
ខ្លឹមសារ បន្តលើកឡើងទៀតថា សាហាវ ! ម៉េច ឃើញខ្ញុំនៅតែឯង គិតថាខ្ញុំនេះងាយយកមកលេងសើចឬយ៉ាងម៉េច? ចង់មានរឿងខ្លាំងណាស់មែនទេ? សំអុយឈ្មោះខ្ញុំរាប់ឆ្នាំហើយ នៅមិនទាន់គ្រប់ទៀត ជាតិណាទើបឈប់? ឬទាល់តែមនុស្សទាំងលោកនេះគេព្រួតគ្នាស្តោះទឹកមាត់ដាក់មុខទើបអ្នកស្វាង? ខ្ញុំនិយាយពីស្អី អ្នកដឹងខ្លួនហើយ ហើយកុំគិតថា នៅសម្ងំប្រមូលពាក្យខ្ញុំទៅសន្សំរឿងដើម្បីរៀបគំរោងមកប្តឹងផ្តល់ដូចនាងធ្លាប់ធ្វើដាក់គេឲ្យសោះ កុំអី សូមអង្វរ ខ្ញុំគ្មានខ្នងដូចអ្នកទេ ខ្ញុំខ្លាច. តែសូមអ្នកប្រើខួរក្បាលល្អពិចារណាពីស្នាដៃខ្លួនអោយច្បាស់ ថាតើការនិយាយមួលបង្កាច់ខ្ញុំអញ្ចឹង ភស្តុតាងប៉ុណ្ណឹង សាក្សីក៏មានច្រើន តើអ្នកឬក៍ខ្ញុំដែលត្រូវប្តឹង? អ្នកត្អូញប្រាប់គេថា ខ្លួនជាជនរងគ្រោះ តែអ្នកមានដែលបានទាក់ទងមកខ្ញុំដើម្បីបំភ្លឺទេ បើពិតជាត្រឹមត្រូវ? អត់ទេ តែបែរជាទៅបង្ហោះពាក្យដៀមដាមហូរហែរដូចថែមសាំងលើភ្លើង តើសម្តីថ្លោសៗរបស់អ្នកនោះសមទេថានាងជាជនរងគ្រោះ? តើត្រង់ណាដែលអ្នកថានាងមិនដឹងរឿង ? នរណាជឿ ? កុំភ្លេចពាក្យលែបខាយវ៉ៃផ្លែរបស់អ្នកដែលបានបង្ហោះទាំងប៉ុន្មានវានឹងចូលជាមួយពាក្យបណ្តឹងដែរហើយទោះជាអ្នកខំលុបចេញក៍ដោយក៍គ្រប់គ្នានៅមានដែរ ។ កុំបាច់ឆ្លើយដាក់អ្នកផ្សេង ព្រោះទោះជាយ៉ាងណា ក្នុងនាមអ្នកជាប្រធាន និងជាម្ចាស់ Page ម្ចាស់ website អ្នកត្រូវតែទទួលខុសត្រូវជាដាច់ខាតក្នុងរឿងនេះ ! បើចិត្តកូនស្រី កុំលេងរត់ ! ! សូមអធ្យាស្រ័យបងប្អូន ខ្ញុំមិនចង់ទេរឿងឈ្លោះ ពិសេសជាមួយអ្នកសិល្បៈ ខ្ញុំរិតតែមិនដែលមាន ប៉ុន្តែរឿងនេះ នាងបំពានខ្ញុំមុន ទាំងដែលខ្ញុំតែងស្រលាញ់នាង ការពារនាងពេលត្រូវគេជេរប្រមាថ ។ តែនាងលបត្របាក់ខ្ញុំឥតល្ហែរ ។ ធ្លាប់អហោសិកម្មអោយច្រើនហើយ ប៉ុន្តែលើកនេះអត់ទេត្រូវតែប្រាប់អោយគេដឹងខ្លាចបើខ្ញុំមានរឿងអី ឬត្រូវបាត់បងការងារ ក៍ព្រោះតែពួកគេហ្នឹង ព្រោះពួកគេមួលបង្កាច់បំនងសម្លាប់ខ្ញុំទាំងរស់ណាបងប្អូន ចេតនាចង់អោយខ្ញុំមានទោសពីបទប្រមាថព្រះមហាក្ស័ត្រ ប្រមាថស្ថាប័ណ្ណជាតិ និងប្រមាថប្រាក់រៀលខ្មែរ ។ គេចង់អោយខ្ញុំត្រូវថ្នាក់លើអាក់អន់ចិត្តទាំងយល់ច្រលំដូចលើកមុនៗ ដើម្បីបំបាត់ប្រជាប្រិយភាពខ្ញុំ បន្ថយការងារខ្ញុំ តើឱយខ្ញុំព្រងើយមិនឆ្លើយម៉េចនឹងបាន ? ហើយតើក្នុងគ្រាដែលខ្ញុំខំតស៊ូទាំងបងទាំងប្អូនទាំងកូនក្មួយមួយត្រកូលប្រឹងបង្កើនស្នាដៃជួយជ្រោងសិល្បៈដើម្បីមុខមាត់ជាតិ និងមិនដែលលើកដៃសំពះសុំលុយមួយរៀលពីអ្នកណា សូម្បីសមាគមសិល្បៈអ្នកនាង ចន ច័ន្ទ នេះ ក៍មិនដែលផ្តល់កិត្តយសស្អីអោយក្រុមគ្រួសារខ្ញុំដែរ តែទៅជាអ្នកនាងប្រធានសមាគមសិល្បៈដែលមាននាទីជួយថែរអ្នកសិល្បៈនេះប្រើគតិអវិជ្ជាមកបំផ្លាញចង់ផ្តាច់ពូជអ្នកសិល្បៈទៅវិញ តើបងប្អូនគិតថាគាត់ធ្វើនេះត្រឹមត្រូវដែរទេ ? បែបនេះគេអាចហៅប្រធានសមាគមនេះថាជាជនបំផ្លាញធនធានវប្បធម៌បានទេ ? ហើយអាចហៅបានទេថាជាដង្កូវក្នុងសាច់ ? តើគេគួរមានទោសកម្រិតណា ? សូមបងប្អូនអានហើយពិចារណា និងផ្តល់ខមិនយុត្តិធម៌ខ្ញុំផង។
សូមជម្រាបថា website មួយឈ្មោះ Dara News ( តារាញូស៍ )របស់សមាគមសិល្បៈដែលគេស្គាល់ថាអ្នកនាង ចន ច័ន្ទលក្ខិណា ជាប្រធាននោះ បាន Share យក Status របស់ខ្ញុំមកផ្សាយបន្ត ហើយPage សមាគមសិល្បៈរបស់អ្នកនាង ចន ច័ន្ទលក្ខិណា ដដែលនេះ ក៏យកមកផុសលើគណនីគាត់ដែរ ប៉ុន្តែពួកគេមិនបានរក្សាភាពដើមឲ្យខ្ញុំទេ គឺគេបានបន្ថែមរូបលុយខ្មែរ ក្រដាស១០០០រៀល ដែលមានព្រះឆាយាល័ក្ខព្រះមហាវីរក្សត្រដល់ទៅពីរសន្លឹក ព្រមទាំងបានថែមល្បោយរោយម្ទេសជាពាក្យថា " ទាំងព្រលឹមហ្មង ៖ ម៉េង កែវពេជ្ជតា ព្រលះធនាគារជាតិយ៉ាងចាស់ដៃរឿងលុយថ្មី .." ពាក្យរបស់គាត់ទាំងនេះ ប្រាសចាកឆ្ងាយពីអត្ថន័យនិងបំណងខ្ញុំដែលបង្ហោះក្នុង Status ខ្ញុំទាំងស្រុង ធ្វើឲ្យមជ្ឍដ្ឋានខ្លះ ប៊ិះនឹងយល់ច្រឡំមកលើខ្ញុំ ដូច្នេះហើយ ទើបខ្ញុំត្រូវតែចេញមកពន្យល់ ។ ហើយសារនេះ ខ្ញុំសរសេរគ្មានបំណងចង់ឲ្យនាងសូមទោសស្អីទេ ព្រោះដឹងហើយថានាង គ្មានទំនួលខុសត្រូវស្ទើរតែគ្រប់រឿង ដូច្នេះខ្ញុំមិនរង់ចាំទេ គ្រាន់តែខ្ញុំចង់ជម្រាបដល់មហាជនឲ្យបានដឹងពីអ្នកនៅពីក្រោយរឿងនេះថា ជាទេពអប្សរចិត្តព្រាយហ្នឹងហើយ។ ហើយក៏ចង់ជម្រាបដល់ស្ថាប័ន ដែលពាក់ព័ន្ធដែរ សូមលោកមេត្តាកុំយល់ខុសលើនាងខ្ញុំ រឿងនេះគឺខាងពួកគេអ្នកធ្វើទេបើចង់ស្អប់ ឬស្រលាញ់ចង់ហៅទៅហូបតែចត់ម្តងទៀត សូមលោកហៅពួកគាត់ទៅ នាងខ្ញុំមិនពាក់ព័ន្ធឡើយសូមអរគុណ។ សេចក្តីគួរពុំគួរសូមរួមមតិដោយថ្លៃថ្នូរ។ ជូនពរជោគជ័យនិរន្តន៕
