មណ្ឌលគិរីៈ បទល្មើសព្រៃឈើ បច្ចុប្បន្នគេមើលឃើញថា កំពុងរីករាលដាលទៅរកភាពវិនាសនាថ្ងៃអនាគត ខណៈក្រុមឈ្មួញពាក់ព័ន្ធនៅតែបន្តរកស៊ី និងដឹកជញ្ជូនដោយខុសច្បាស់។
ថ្មីៗនេះ នៅខេត្តភាគឦសានប្រទេសកម្ពុជា បទល្មើសព្រៃឈើហាក់មានសន្ទុះឡើងវិញ ក្នុងនោះ មានខេត្តក្រចេះ ស្ទឹងត្រែង រតនគិរី និងមណ្ឌលគិរី ជាដើម។ បើនិយាយពីខេត្តមួយក្នុងចំណោមខេត្តទាំង៤នេះ ខេត្តមណ្ឌលគិរី ជាខេត្តមួយដែលពោរពេញទៅដោយបទល្មើសច្រើន ក្នុងនោះ មានទាំងទំនិញគេចពន្ធ និងការចរាចរឈើខុសច្បាប់ផងដែរ។
តាមសេចក្តីរាយការណ៍បានឲ្យដឹងថា បច្ចុប្បន្ននេះ មន្ត្រីធំៗប្រចាំច្រកណាំលៀ ហៅច្រកប៉ុស្តិ៍៧ ស្ថិតក្នុងពេជ្រាដា ជាអ្នកពាក់ព័ន្ធបើកដៃឲ្យឈ្មួញនាំចេញឈើប្រណីតទៅលក់នៅប្រទេសវៀតណាម។
សេចក្តីរាយការណ៍បន្តទៀតថា មានឈ្មួញជាច្រើននាក់ កំពុងរកស៊ីដឹកជញ្ជូនឈើប្រណីតតាមច្រកណាំលៀ ក្នុងនោះក៏មានសេចក្តីរាយការណ៍ទៀតថា លោកឧកញ៉ា ហ៊ុន ជា ដែលត្រូវជាក្មួយនាយករដ្ឋមន្ត្រី សម្តេចតេជោ ហ៊ុន សែន ក៏ពាក់ព័ន្ធរឿងនេះដែរ។
ជុំវិញការចោទថា លោកឧកញ៉ា ហ៊ុន ជា ជាអ្នកនៅពីក្រោយឈ្មួញរកស៊ីខុសច្បាប់នៅខេត្តមណ្ឌលគិរី លោកធ្លាប់បដិសេធ។ អង្គភាពសារព័ត៌មាន Cam Post មិនអាចទំនាក់សំការបំភ្លឺពីលោក ហ៊ុន ជា បានទេ នៅថ្ងៃអាទិត្យនេះ។
ស្នងការនគរបាលខេត្តមណ្ឌលគិរី លោក អ៊ុក សំណាង បានសន្យាថា នឹងប្រើវិធានការជំនាញ ដើម្បីបង្រ្កាបបទល្មើសព្រៃឈើ ពិសេសគឺមន្រ្តីពាក់ព័ន្ធតាមច្រក។
លោកស្នងការ បញ្ជាក់ប្រាប់ Cam Post នៅព្រឹកថ្ងៃអាទិត្យ ទី១២វិចិ្ឆកានេះថា “ម្សិលមិញ មានព្រះរាជអាជា្ញរងមួយរូប និងស្នងការរងទទួលផែនបទល្មើសមួយរូប រួមទាំងអ្នកពាក់ព័ន្ធ បានចុះទៅច្រកណាំលៀ ដោយប្រើជំនាញបង្រ្កាប”។ ប៉ុន្តែលោកមិនលម្អិតពីចំណាត់ការក្តៅទៅលើក្រុមឈ្មួញរកស៊ីបទល្មើសព្រៃឈើ ក្នុងនោះ មានទាំងក្មួយនាយករដ្ឋមន្រ្តីផង។
លោក អ៊ុក សំណាង បានបន្ថែមខ្លឹមសារថា ថ្មីៗនេះ សមត្ថកិច្ចខេត្តមណ្ឌលគិរី បានចាត់វិធានការបង្រ្កាបបទល្មើសព្រៃឈើ បានជាបន្តបន្ទាប់នៅក្នុងស្រុកកែវសីមា ហើយចំណាត់ការនេះ នឹងបន្តរហូតដូចភ្លៀងរលឹម៕
