កណ្ដាលៈ ជនសង្ស័យម្នាក់ ត្រូវប៉ូលិសចាប់ខ្លួនបានភ្លាមៗ បន្ទាប់ពីសកម្មភាពបាញ់ប្លន់ នៅចំណុចកាស៊ីណូថ្មពេជ្រ កាលពីវេលាម៉ៅង១២៖១៥នាទីយប់ ថ្ងៃទី២០ ខែវិច្ឆិកា ឆ្នាំ២០១៧ ក្នុង ភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្ដាល។
សមត្ថកិច្ចបានឲ្យដឹងថា ជនរងគ្រោះ និងជាតំណាងកាស៊ីណូថ្មពេជ្រ ឈ្មោះ អៀង សុងទ្រី ភេទប្រុស អាយុ២៥ឆ្នាំ ជនជាតិខ្មែរ មានទីលំនៅស្នាក់នៅក្នុងកាស៊ីណូ ក្នុងភូមិឃុំកើតហេតុខាងលើ។ ចំណែកជនសង្ស័យឈ្មោះ អ៊ំ សុភក្រ័ ភេទប្រុស អាយុ៣៤ឆ្នាំ ជនជាតិខ្មែរ មានទីលំនៅសង្កាត់សែនសុខ ខណ្ឌពោធិ៍សែនជ័យ រាជធានីភ្នំពេញ មុខរបរ មិនពិតប្រាកដ(ឃាត់ខ្លួន)។
ក្រោយការចាប់ខ្លួន ប៉ូលិសដកហូតវត្ថុតាងបានមួយចំនួនរួមមាន៖ ទី១. អាវុធខ្លី ម៉ាក់ប៉េអាកុល តួពណ៌ស ស្នាប់ពណ៌ខ្មៅ១ដើម លេខ ៥៥៥៩A1.USA ទី២. ស្រោមអាវុធខ្លីជរ័ ពណ៌ខ្មៅ១ ទី៣. បង់ពីរមានគ្រាប់៩ ទី៤. ខ្នោះដៃ១ ទី៥. ម៉ូតូហុងដាគុប សេ៥០ ពណ៌ស្លែ ពាក់ស្លាកលេខ ភ្នំពេញ 1AA-1509 ចំនួន១គ្រឿង ទី៦. កាបូបស្ពាយ ពណ៌ឈាមជ្រូក១ ទី៧. សម្ភារៈផ្សេងៗមួយចំនួនតូច ទី៨. ទូរស័ព្ទដៃម៉ាក IPHONE 5 ពណ៌ទឹកមាស១គ្រឿង។ ការខូចខាតរួមមាន៖ ស្នាមបែកធ្លុះ និងស្រាំកញ្ចក់បន្ទប់ដាក់សម្ភារៈ១កន្លែង។
សមត្ថកិច្ច បានបន្តថា នៅយប់ថ្ងៃទី២០ វិច្ឆិកា ២០១៧ វេលាម៉ោង១២៖១៥នាទី ឆ្លងចូលថ្ងៃទី២១ វិច្ឆិកា ២០១៧ នៅពេលដែលបុគ្គលិកកាស៊ីណូកំពុងតែរៀបចំទុកដាក់សម្ភារៈលុយកាក់ ក្រោយពេលអស់ភ្ញៀវ ក៏ស្រាប់តែមានជនសង្ស័យម្នាក់ ឈ្មោះ អ៊ុ សុភក្រ័ បានកាន់កាំភ្លើងខ្លី១ដើម ដើរសំដៅចូលមកក្នុងបន្ទប់ សង្វៀនកាស៊ីណូហើយស្រែកថា នៅឲ្យស្ងៀម ភ្លាមនោះបុគ្គលិក និងសន្ដិសុខកាស៊ីណូ បានឃើញហើយក៏ស្រែកថា ហ្អែងកុំចូលមក តែភ្លាមនោះជនសង្ស័យក៏បានលើកកាំភ្លើងឡើងភ្ជង់
សំដៅមកបុគ្គលិក និងសន្ដិសុខ ពេលនោះខាងសន្ដិសុខកាស៊ីណូ ក៏បាននាំគ្នាព្រួតចាប់ក៏មានការប្រតាយប្រតប់គ្នា រហូតចាប់ជនសង្ស័យបាន រួចបាន រាយការណ៍ជូនសមត្ថកិច្ចតែម្ដង។ ករណីខាងលើនេះ សមត្ថកិច្ចកំពុងបន្តចាត់ការតាមនីតិវិធី៕