ព្រះសីហនុៈ បុរសលក់លៀសហាលម្នាក់ ត្រូវរថយន្តដឹកប្រេងឥន្ធនៈរបស់ក្រុមហ៊ុនតេលា បុកខ្ទេចក្បាល ធ្លាយខួរស្លាប់យ៉ាងអាណោចអាធម នាវេលាម៉ោង៦ និង៤០នាទី ថ្ងៃទី១៥ ខែវិច្ឆិកា ឆ្នាំ២០១៧ នៅលើផ្លូវសម្តេចសង្ឃទេពវង្ស ចំណុចបង្គោលគីឡូម៉ែត្រលេខ១៦-១៧ ស្ថិតក្នុងក្រុមទី១៩ ភូមិ១ ឃុំទំនប់រល កស្រុកស្ទឹងហាវ ខេត្តព្រះសីហនុ។
ប្រភពព័ត៌មានបានឲ្យដឹងថា រថយន្តបង្កម៉ាក STERLING សណ្តោងរុឺម៉ក់ របស់ក្រុមហ៊ុនប្រេងឥន្ធនៈ កម្ពុជាតេលា ពាក់ស្លាកលេខ ភ្នំពេញ 3B-6805 បានមុកម៉ូតូ១គ្រឿង ម៉ាកវ៉េវ ពណ៌ខ្មៅ គ្មានស្លាកលេខ បើកបរដោយឈ្មោះ មូល ភណ្ឌ ភេទប្រុស អាយុ៣៤ឆ្នាំ មុខរបរលក់លៀសហាល មានទីលំនៅភូមិបឹងវែង ឃុំវាលរិញ ស្រុកព្រៃនប់ ខេត្តព្រះសីហនុ បណ្តាលឲ្យអ្នកបើកបរម៉ូតូបែកក្បាល ធ្លាយខួរ ដេកស្លាប់ក្នុងធ្លុកឈាម យ៉ាងអាណោចអាធ័ម។ ចំណែកអ្នកបើកបររថយន្ត បានរត់គេចខ្លួនបាត់ស្រមោល។
ក្រោយកើតហេតុ សមត្ថកិច្ចចុះទៅវាស់វែង ហើយបានទាក់ទងសាច់ញាតិឲ្យមកយកសពជនរងគ្រោះទៅលំនៅឋានធ្វើបុណ្យតាមប្រពៃណី។ ដោយឡែកមធ្យោបាយធ្វើដំណើរទាំង២គ្រឿង នគរបាលស្រុកស្ទឹងហាវ យកទៅរក្សាទុករង់ចាំដោះស្រាយតាមផ្លូវច្បាប់៕
