ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថា កម្ពុជា គ្មានហេតុផលណាមួយ ដែលដឹកនាំប្រទេស ដោយមិនប្រកបតាមលទ្ធិប្រជាធិបតេយ្យនោះឡើយ ហើយរាជរដ្ឋាភិបាល និងក្រសួងមហាផ្ទៃ ធ្វើនាពេលបច្ចុប្បន្ននេះ ស្របទៅតាមនីតិរដ្ឋ និងពង្រឹងលទ្ធិប្រជាធិបតេយ្យនៅកម្ពុជាប៉ុណ្ណោះ។
ក្នុងកិច្ចជំនួបពិភាក្សាការងារជាមួយសម្តេច ស ខេង កាលពីថ្ងៃទី១៦ ខែវិច្ឆិកា ឆ្នាំ២០១៧ លោក Gunnar Wiegand មន្ត្រីជាន់ខ្ពស់សហភាពអឺរ៉ុប (EU) បានលើកឡើងពី ស្ថានភាពនយោបាយកម្ពុជានាពេលបច្ចុប្បន្ន។ លោកថា EU ចង់ឃើញដំណើរការលទ្ធិប្រជាធិបតេយ្យសេរីពហុបក្សនៅកម្ពុជា ឲ្យកាន់តែមានភាពល្អប្រសើបន្ថែមទៀត។
ក្នុងឱកាសនោះ សម្តេច ស ខេង បានឆ្លើយតបទៅនឹងការលើកឡើងរបស់ EU ថា “ កម្ពុជាគ្មានហេតុផលណាដឹកនាំប្រទេសដោយមិនប្រកបតាមលទ្ធិប្រជាធិបតេយ្យនោះឡើយ ហើយរាជរដ្ឋាភិបាលកម្ពុជាក៏ដូចជាក្រសួងមហាផ្ទៃធ្វើនាពេលបច្ចុប្បន្ននេះ គឺស្របទៅតាមនីតិរដ្ឋ និង ពង្រឹងលទ្ធិប្រជាធិបតេយ្យនៅកម្ពុជាតែប៉ុណ្ណោះ ”។
សម្ដេចបញ្ជាក់ថា ស្ថានភាពនយោបាយនាពេលបច្ចុប្បន្ននេះ កម្ពុជាធ្វើឡើងស្របទៅតាមច្បាប់ប៉ុណ្ណោះ ដើម្បីរក្សាសន្តិភាព និងសន្តិសុខជូនដល់ពលរដ្ឋ។ កម្ពុជាស្វាគមន៍ជានិច្ចរាល់ការគាំទ្ររបស់ EU ហើយកម្ពុជាអគុណជានិច្ចចំពោះ EU ដែលនៅបន្ត ជួយអភិវឌ្ឍន៍លើគ្រប់វិស័យនៅកម្ពុជារួមទាំងពង្រឹងកិច្ចសហប្រតិបត្តិការទ្វេភាគីជាមួយកម្ពុជាក្នុងការទប់ស្កាត់អំពើភេរវកម្មនិងពង្រឹងសន្តិសុខក្នុងតំបន់ក៏ដូចជាពិភពលោក។
លោក Gunnar Wiegand បានឲ្យដឹងថា កម្ពុជា គឺជាមិត្តដ៏ល្អជាមួយ EU ហើយពាណិជ្ជកម្មរបស់កម្ពុជាប្រមាណ៤០ភាគរយ បាននាំទៅសហភាពអឺរ៉ុបជារៀងរាល់ឆ្នាំ ដូច្នេះអ្វីដែលសហភាពអឺរ៉ុបចង់ពង្រឹងបន្ថែមទៀតជាមួយកម្ពុជា គឺលើផ្នែកសន្តិសុខក្នុងតំបន់ក៏ដូចជាពិកភពលោកព្រមទាំងរួមគ្នាកំចាត់នូវអំពើភេរវកម្មជាដើម។
ការថ្លែងរបស់សម្តេច ស ខេង ក្រោយពីតុលាការកំពូលបានប្រកាសរំលាយគណបក្សសង្រ្គោះជាតិឲ្យស្របទៅតាមច្បាប់ ស្តីពីគណបក្សនយោបាយ ក្រោយពីមេបក្សនេះ បានប្រព្រឹត្តអំពើក្បត់ជាតិ៕
