ភ្នំពេញៈ ស្រ្តីម្នាក់ ត្រូវលោកប្ដីចិត្តកំណាចស្រវឹងស្រា ទាញយកកាំបិតបុ័ងតោប៉ុនប៉ងអារ.កសម្លាប់ តែសំណាងមិនស្លាប់ គ្រាន់តែរងរបួសធ្ងន់។
ករណីដ៏ឃោរឃៅខាងលើនេះ បានបង្កការភ្ញាក់ផ្អើលកាលពីវេលាម៉ោង៨យប់ថ្ងៃទី២៨ ខែវិច្ឆិកា ឆ្នាំ២០១៧ នៅចំណុចមុខផ្ទះគ្មានលេខ ផ្លូវលេខ២១៧ ភូមិឫស្សី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
មន្រ្តីនគរបាល បានឲ្យដឹងថា ជនសង្ស័យជាប្តីឈ្មោះ រី ភារៈ ភេទប្រុស អាយុ៣៧ឆ្នាំ ជនជាតិខ្មែរ មុខរបរលក់ត្រី ទីលំនៅផ្ទះជួល ផ្លូវលំ ភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។ ប្រពន្ធឈ្មោះ ញ៉ាញ់ មុំ ភេទស្រី អាយុ៤៣ឆ្នាំ ជនជាតិខ្មែរ មុខរបរ លក់ត្រីដូចគ្នា រងរបួសធ្ងន់ កំពុងសម្រាកព្យាបាលរបួសនៅមន្ទីរពេទ្យសួរគ៌ា សង្កាត់ស្ទឹងមានជ័យ៣។
ប្រភពព័ត៌មាន បានឲ្យដឹងថា មុនពេលកើតហេតុ ជនសង្ស័យជាប្តីស្រវឹងស្រា បានដើរហៅ ប្រពន្ធឲ្យឈប់ដូរត្រឡប់ទៅផ្ទះវិញ តែប្រពន្ធមិនព្រម ក៏មានទំនាស់ពាក្យសំដី និងវាយប្រតាយប្រតប់គ្នា ហើយជនសង្ស័យបានកាំបិតបុ័ងតោរបស់ជនរងគ្រោះ សម្រាប់ធ្វើត្រីលក់មកចាប់អារ.កជនរងគ្រោះបណ្តាលឲ្យរបួសធ្ងន់។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធី៕
