ប្រធានាធិបតីអាមេរិក លោក ដូណាល់ ត្រាំ បានសម្ដែងការគាំទ្រដល់ប្រតិបត្តិការបោសសំអាត អំពើពុករលួយដឹកនាំដោយរាជទាយាទអារ៉ាប៊ីសាអ៊ូឌីត គឺព្រះអង្គម្ចាស់ Mohammad bin Salman ប្រឆាំងនឹងខ្សែរាជវង្ស និងអ្នកជំនួញមានឥទ្ធិពលមួយចំនួននៅក្នុងប្រទេស។
នេះបើយោងតាមគេហទំព័រសារព័ត៌មាន រុស្ស៊ី (RT) បានចេញផ្សាយនាព្រឹកថ្ងៃអង្គារ ទី០៧ ខែវិច្ឆិកា ឆ្នាំ២០១៧។កាលពីសប្ដាហ៍មុន ព្រះអង្គម្ចាស់ ១១អង្គ រដ្ឋមន្ត្រី ០៤រូប និងអ្នកជំនួញ ដ៏មានឥទ្ធិពលមួយចំនួន ដូចជាព្រះអង្គម្ចាស់ Alwaleed bin Talal (ជាមហាសេដ្ឋី) ត្រូវបានមន្ត្រីប៉ូលិសអារ៉ាប៊ីសាអ៊ូឌីត ចាប់ឃុំខ្លួនបណ្ដោះអាសន្ន ស្ថិតក្រោមការស៊ើបអង្កេតពាក់ព័ន្ធនឹងអំពើពុករលួយ និងលាងលុយខ្មៅ។ ដោយឡែក ជុំវិញប្រតិបត្តិការនេះដែរ ប្រធានាធិបតីអាមេរិក លោក ដូណាល់ ត្រាំ បានសម្ដែងការគាំទ្រដល់ការស៊ើបអង្កេតដឹកនាំដោយ ព្រះអង្គម្ចាស់ Mohammad bin Salman។
គួរបញ្ជាក់ផងដែរថា ធនាគារអារ៉ាប៊ីសាអ៊ូឌីតជាច្រើន បានចាប់ផ្ដើមបង្កក កាលពីម្សិលមិញ នូវគណនីរបស់ជនសង្ស័យ ដែលត្រូវបានចាប់ខ្លួន នៅក្នុងយុទ្ធនាការប្រឆាំងអំពើពុករលួយ ដឹកនាំដោយព្រះអង្គម្ចាស់ រាជទាយាទ Mohammed bin Salman ក៏ប៉ុន្តែក្រុមអ្នកជំនាញខ្លះ និយាយថាប្រតិបត្តិការនេះ ធ្វើឡើងក្នុងគោលបំណងពង្រឹងអំណាចព្រះបុត្រាស្នងរាជ្យ៕
