ព្រះអង្គម្ចាស់អារ៉ាប៊ីសាអ៊ូឌីតម្នាក់ ដែលជាមនុស្សម្នាក់ក្នុងចំណោមមនុស្សដែលមានបំផុតនៅលើពិភពលោក ត្រូវបានគេចាប់ខ្លួន តាមការចោទប្រកាន់ ចំពេលមានការបង្ក្រាបប្រឆាំងនឹងអំពើពុករលួយភ្លាមៗនៅប្រទេសអារ៉ាប៊ីសាអ៊ូឌីត។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃអាទិត្យ ទី០៥ ខែវិច្ឆិកា ឆ្នាំ២០១៧។
ព្រះអង្គម្ចាស់អារ៉ាប៊ីសាអ៊ូឌីត Alwaleed bin Talal គឺជាមនុស្សម្នាក់ក្នុងចំណោម ១១នាក់ផ្សេងទៀត ដែលត្រូវបានចាប់ខ្លួនដោយគណៈកម្មាធិការប្រឆាំងអំពើពុករលួយថ្មី បន្ទាប់ពីព្រះបាទ Salman bin Abdulaziz Al Saud បានបង្កើតឡើងនាពេលថ្មីៗនេះ។ យោងតាមទស្សនាវដ្ដី Forbes បានចេញផ្សាយនាពេលថ្មីៗនេះថា ចៅប្រុសរបស់ស្ដេចអារ៉ាប៊ីសាអ៊ូឌីត Alwaleed bin Talal ត្រូវបានគេចាត់ទុកថា ជាមហាសេដ្ឋីទី ៤៥ នៅលើពិភពលោក ហើយមានទ្រព្យសម្បត្តិចន្លោះពី១៨ ទៅ១៩ពាន់លានដុល្លារ។
គួរបញ្ជាក់ផងដែរថា ព្រះអង្គម្ចាស់ Alwaleed bin Talal គឺមានភាគហ៊ុនដ៏សំខាន់នៅក្នុងក្រុមហ៊ុន Apple, Netscape Communications, Citigroup, សណ្ឋាគារ Four Seasons George V និង Twitter ហើយក៏ជាវិនិយោគិននៅក្នុងសារព័ត៌មាន News Rupert Murdoch ចាប់តាំងពីឆ្នាំ១៩៩៧ មកម្ល៉េះ៕
