កំពង់ស្ពឺៈ កម្លាំងសមត្ថកិច្ចចម្រុះ បានចុះបង្ក្រាបទីតាំងផលិតសម្បកសាច់ក្រកមួយកន្លែង ស្ថិតក្នុងនៅភូមិថ្មីពីងពង់ ឃុំដំណាក់រាំង ស្រុកឧដុង្គ ខេត្តកំពង់ស្ពឺ កាលពីវេលាម៉ោង១រសៀល ថ្ងៃទី២៩ ខែវិច្ឆិកា ឆ្នាំ២០១៧។
ប្រតិបត្តិការនេះ ធ្វើឡើងដោយមានការចូលរួមពីគណៈកម្មការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ មន្រ្តីតំណាងមន្ទីរឧស្សាហកម្ម និងសិប្បកម្ម រួមទាំងអង្គភាពតុលាការ និងមន្ត្រីពាក់ព័ន្ធជាច្រើនទៀត។
មន្ត្រីចុះបង្ក្រាបបទល្មើសនេះ បានបញ្ជាក់ថា ទីតាំងផលិតសម្បកសាច់ក្រកនេះ ស្ថិតនៅលើដីឡូតិ៍របស់ឈ្មោះ កែប ប៊ុនធឿន ភេទប្រុស អាយុ៥២ឆ្នាំ និងមានម្ចាស់ទីតាំងឈ្មោះ វីង ហ៊ុយ ភេទប្រុស អាយុ៣៩ឆ្នាំ រស់នៅផ្សារអូរឫស្សី រាជធានីភ្នំពេញ។
ក្រោមកិច្ចបង្ក្រាបនេះ សមត្ថកិច្ចបានរកឃើញវត្ថុធាតុដើម និងសម្ភារជាច្រើន រួមមាន ធុងជ័រប្រើរួច១.៤០០ធុង, ធុងជ័រអំបិល១.០០០ធុង, ហីត្រូសែន២៩ធុង ស្មើនឹង១.០០០លីត្រ, ធុងពោះវៀន ប្រើប្រាស់បាន១៨ធុង, ធុងខ្លាញ់សរ សម្រាប់លាបលើក្រណាត់ច្រកសម្បកសាច់ក្រក១៣ធុង, ថ្នាំលាបឲ្យរអិល៣ប៉ាវ, ទឹកពង្រីកពោះវៀន២០ធុង, អីធឺរ៉ុក st50 ៥ធុង, ស្រោមសាច់ក្រកស្ងួតតូចធំ៧៨កេះ, ស្រោមសាច់ក្រកផលិតរួច២០ដុំ និង៤ថង់។
មន្ត្រីខាងលើ បានបញ្ជាក់ថា ទីតាំងនេះ គ្មានច្បាប់អនុញ្ញាតត្រឹមត្រូវ ហើយបានប្រើប្រាស់វត្ថុធាតុដើម ដែលមានសារធាតុជាតិគីមីហាមឃាត់មួយចំនួន ដែលធ្វើឲ្យប៉ះពាល់ដល់អ្នកប្រើប្រាស់។
ក្រោយចុះបង្ក្រាប និងត្រួតពិនិត្យ សមត្ថកិច្ចចម្រុះបានសម្រេចផ្អាកសកម្មភាពផលិតសម្បកសាច់ក្រកនៅទីតាំងខាងលើបណ្ដោះអាសន្ន ដើម្បីរង់ចាំត្រួតពិនិត្យ និងធ្វើតេស្តបន្តទៀត៕
