ភ្នំពេញៈ បុរសម្នាក់ ឃើញប្រពន្ធគេនៅម្នាក់ឯងដូចជាទំនង បន្លំចូលទៅសុំទឹកហូប ហើយក៏ធ្វើសកម្មភាពចាប់ឱប និងដោះអាវ បម្រុងរំលោភ តែមិនបានសម្រេច ត្រូវបានប្តីគេមកទាន់ចាប់ប្រគល់ឲ្យសមត្ថកិច្ចតែម្ដង។
ហេតុការណ៍នេះ បង្កការភ្ញាក់ផ្អើលកាលពីរសៀលថ្ងៃទី២៣ ខែវិច្ឆិកា ឆ្នាំ២០១៧ នៅបន្ទប់ជួលលេខ៦ ជាន់ទី៣ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ។
ជនសង្ស័យឈ្មោះ ផួង វិចិត្ត ភេទប្រុស អាយុ២៨ឆ្នាំ មុខរបរបើករថយន្ត ស្រាបៀរ ស្នាក់នៅបន្ទប់ជួលជាន់ទី២ ផ្ទះកើតហេតុខាងលើ មានស្រុកកំណើរនៅខេត្តស្វាយរៀង។ ស្រ្តីរងគ្រោះមានឈ្មោះ ផន ស្រីម៉ៅ អាយុ២៤ឆ្នាំ មុខរបរកម្មកររោងចក្រ រស់នៅបន្ទប់ជួលជាន់ទី៣ ភូមិ ត្រពាំងថ្លឹង១ សង្កាត់ចោមចៅ ១ ខណ្ឌពោធិ៍សែនជ័យ។
ប្រភពព័ត៌មាន បានឲ្យដឹងថា នៅមុនពេលកើតហេតុ ស្រ្តីរងគ្រោះនៅក្នុងបន្ទប់ម្នាក់ឯង ដោយប្តីនាងចេញទៅក្រៅ ពេលនោះជនសង្ស័យដើរឡើងទៅជាន់ទី៣ ដោយដើរកាត់មុខបន្ទប់ស្រ្តីរងគ្រោះ ហើយក្រឡេកឃើញនាងអង្គុយម្នាក់ឯង ដូចជាទំនង ក៏ប្រើល្បិចចូលសុំទឹកហូប រួចហើយចាប់ឱបថើប ប្រលេះឡេវអាវ បម្រុងរំលោភ តែមិនបានសម្រេច អាសន្នធំប្ដីស្រ្តីរងគ្រោះក៏មកទាន់ ហើយជនសង្ស័យក៏រត់ចុះទៅសម្ងំក្នុងបន្ទប់ខ្លួនវិញនៅជាន់ទី២ លុះរហូតដល់ព្រលប់ថ្ងៃដដែល ទើបប្ដីស្រ្តីរងគ្រោះចាប់ប្រគល់ឲ្យសមត្ថកិច្ច។
បច្ចុប្បន្នជនសង្ស័យ ត្រូវបាននគរបាលប៉ុស្តិ៍ចោមចៅ១ កំពុងធ្វើការសាកសួរ និងកសាងសំណុំរឿងបញ្ជូនទៅផ្នែកជំនាញអធិការដ្ឋានខណ្ឌ បន្តចាត់ការបន្តតាមនីតិវិធី៕