តាកែវៈ រថយន្ត១គ្រឿង ដឹកកម្មករ កម្មការិនី ជាង១០០នាក់ បានជួបគ្រោះថ្នាក់ក្រឡាប់ នាវេលាម៉ោង៧យប់ ថ្ងៃទី២១ ខែវិច្ឆិកា ឆ្នាំ២០១៧នេះ នៅភូមិត្រពាំងត្រយឹង ឃុំចំបក់ ស្រុកបាទី បណ្តាលឲ្យរងរបួសដេករដូករណែលពេញផ្លូវ។
តាមសេចក្តីរាយការណ៍បានប្រាប់ថា រថយន្តខាងលើនេះ ផ្ទុកកម្មករ កម្មការិនីប្រមាណ១២០នាក់ មកពីឃុំដូង ស្រុកបាទី។ លុះមកដល់ចំណុចកើតហេតុ ក៏ក្រឡាប់ចាក់កម្មករ កម្មការិនី ចេញពីរថយន្តរបួសធ្ងន់ស្រាល ដេករដូករណែលពេញផ្លូវតែម្តង។
ទោះជាយ៉ាងណា ពាក់ព័ន្ធនឹងគ្រោះថ្នាក់នេះ មិនទាន់ដឹងពីមូលហេតុ និងចំនួនអ្នកស្លាប់ និងរបួសនៅឡើយទេ។
ក្រោយកើតហេតុបន្តិច កម្លាំងអន្តរាគមន៍ ដឹកនាំដោយលោក អ៊ុក រី អភិបាលស្រុក និងលោក ង៉ាន់ សារី អធិការនគរបាលស្រុកបាទី ព្រមទាំងសមត្ថកិច្ច បានចុះទៅដល់កន្លែងកើតហេតុដើម្បីជួយសង្គ្រោះអ្នករបួសផងដែរ។
ចំពោះព័ត៌មានបន្ថែមពាក់ព័ន្ធនឹងគ្រោះថ្នាក់ខាងលើនេះ CAMPOST នឹងផ្សាយជូនជាបន្តបន្ទាប់នៅពេលក្រោយទៀត៕
