ភ្នំពេញៈ តារាចម្រៀងបែបមនោសញ្ចេតនា អ្នកនាង មាស លក្ខិណា ត្រូវបានអ្នកក្នុង និងក្រៅប្រទេស ស្គាល់ច្បាស់មួយរយៈចុងក្រោយនេះ បន្ទាប់ពីសំឡេងច្រៀងរបស់អ្នកនាង ស្តាប់មួយភ្លែតស្រដៀងអ្នកស្រី រស់ សេរីសុទ្ឋា។ ក្រៅពីអាជីពសិល្បៈ អ្នកនាងក៏កំពុងត្រូវប៉ាន់មុខរបរលក់ត្រីងៀតដោយរកចំណូលបានស្ទើរតែមិនជឿ។
អ្នកនាង មាស លក្ខិណា បានរៀបរាប់ឲ្យដឹងថា អំឡុងពេលនេះ ទាំងសិល្បៈ និងការងារខាងក្រៅសិល្បៈ គឺដើរទៅមុខយ៉ាងរលូន សឹងថា រកពេលដកឃ្លាមិនរួច។ អ្នកនាងថា ដូចបងប្អូនក្នុង និងក្រៅប្រទេសដឹងហើយថា “ខ្ញុំបានជ្រើសរើសមុខរបរលក់ត្រីងៀត ត្រីប្រលាក់គ្រប់មុខបែបធម្មជាតិ ជាត្រីស្រែយើងសុទ្ធ ហើយកំពុងតែលក់ដាច់រាល់ថ្ងៃ។ មូលហេតុលក់ដូរនេះ ទៅមុខលឿនមកពីយើងចុះទៅទិញត្រីខ្លួនឯង ដល់ទីតាំងតែម្តងមានកំពង់ធំ កំពង់ឆ្នាំង ក្រចេះជាដើម ឬជួនកាលជិះឡានឃើញគេដាក់ម៉ងសំណាញ់អី ចុះទិញ ឬកក់លុយទុកឲ្យគេដើម្បីបានត្រីស្រែល្អៗ”។
មាស លក្ខិណា អះអាងទៀតថា គេលក់ដូរបែបបើកហាង បើកសំអាងការអីអស់ហើយ ទើបនាង និងសាច់ញាតិ សម្រេចបើកមុខរបរលក់ត្រីងៀតប្រឡាក់រូបមន្តខ្លួនឯង។ អ្វីដែលប្លែក គឺនាងមានម៉ូយនៅក្រៅប្រទេស ពិសេសនៅអាមេរិក គឺខ្លាំងតែម្តង ដោយខ្លះមកស្រុកខ្មែរ ឆ្លៀតមកទិញត្រីងៀតត្រីប្រឡាក់របស់នាង ហើយខ្លះទៀត អាណិតស្រឡាញ់ក៏កុម៉្មង់ពីអាមេរិក ថែមទាំងផ្ញើលុយរត់ថ្លៃផ្ញើជូននាង ដែលនេះជាមុខរបរពេញចិត្តមិននឹកស្មានមានការគាំទ្រ។ អ្នកនាងបន្ថែមថា យ៉ាងហោយណាស់ នាងលក់ត្រីងៀត និងត្រីផ្សេងៗអស់ក្នុង១ខែជាងមួយពាន់គីឡូ ហើយបើទោះជានាងកាក់កបបែបណាក៏មិនចោលសិល្បៈដែរ ព្រោះសិល្បៈជួយឲ្យនាងមានកេរ្តិ៍ឈ្មោះ និងកិត្តិយស។
មាស លក្ខិណា គឺជាដៃគូចម្រៀងសមគ្នាជាមួយលោក អ៊ុង សុផល្លី ដូចដៃគូអ្នកនាង ឆោម ឆពុំ និងលោក អ៊ុក ណារី ដោយទៅច្រៀងទីណាគេហៅទាំង២ គ្មានបាត់ម្នាក់ឡើយ។ អ្នកនាងនឹងពង្រីកជំនួញត្រីងៀតឲ្យធំនាពេលខាងមុខនេះ ដោយមានឈ្មោះថា "ពិភពត្រីងៀតធម្មជាតិ មាស លក្ខិណា" ឲ្យកាន់តែល្បី៕
