ភ្នំពេញៈ បទចម្រៀង"គ្រូបង្រៀនស្រវឹងស្រា" របស់ផលិតកម្មថោន ក្រោមស្នាដៃនិពន្ធរបស់លោក យឹម តាស្រង់ នឹងច្រៀងដោយចេនសាយចៃ ត្រូវទទួលការរិះគន់រហូតក្រសួងព័ត៌មាន ប្រកាសបិទមិនឲ្យចេញផ្សាយ។ សម្រាប់អ្នកនាងចេនសាយចៃ ជាអ្នកច្រៀងផ្ទាល់ បានសម្តែងការអធ្យាស្រ័យ ព្រោះគ្មានគោលគំនិតបន្ទាបតម្លៃគ្រូបង្រៀនក្រៅពីអប់រំនោញទេ។
អ្នកនាងចេនសាយចៃ បានចេញមុខបញ្ជាក់ប្រាប់អ្នកយកព័ត៌មាន CAM POST កាលពីរសៀលម្សិលមិញថា អ្នកនាងមិនគិតថា ការច្រៀងចម្រៀងបទ"គ្រូបង្រៀនស្រវឹងស្រា" ប៉ះពាល់ចឹងទេ គ្រាន់តែចង់បង្ហាញជ្រុងតូចមួយ ពីគ្រូម្នាក់ប៉ុណ្ណោះ។ អ្នកនាងថាយ៉ាងណារឿងនេះវាបានកើតឡើង និងបិទបញ្ចប់ក្រោយផ្អាកផ្សាយ បើមានកំហុសឆ្គងសូមខន្តីអភ័យទោសផង។
អ្នកនាងចេនសាយចៃ បន្ថែមថា ចំណុចដែលអ្នកនាងច្រៀងដំបូងគិតថា ប៉ះពាល់ដែរប៉ុន្តែ ដោយយល់ថា បទអ្នកនាងច្រៀងពីមុនដូចជាបទ"ទឹកចិត្តប៉ូលិសចរាចរ" គឺន័យអប់រំល្អ ហើយពេញចិត្តអ្នកទស្សនា។ ក្រោយទទួលដឹងថា មានមតិរិះគន់គឺសោកស្តាយដែលមានកំហុសអចេតនាបែបនេះ។ យ៉ាងណាមិញអ្នកនាង ក៏នៅមានបទចម្រៀងថ្មីៗជាច្រើនទៀត ប្រចាំផលិតកម្មថោន ដើម្បីបំពេរអារម្មណ៍ទស្សនិកជន សម្រាប់ឆ្នាំថ្មី២០១៨ខាងមុខនេះ៕
