Sponsor
អាម៉ាប៉ាប៉ាញ៉ូស

​ត្បូង​ឃ្មុំៈ តាមប្រភពព័ត៌មាន​​​​បាន​ឱ្យ​ដឹងថា ​​​ការ​ដ្ឋាន​កិន​ថ្ម​មួយ​កន្លែងក្បែរ​ភូមិ​ ដែលជា​របស់​លោក​ឧកញ៉ា លីន ប៊ុណ្ណា ខណៈបំផ្ទុះ​យក​ថ្ម​ ស្រាប់តែ​​បំណែក​ថ្ម​បាន​ខ្ទាត​ប៉ើង​ទៅ​លើ​អាកាស​​ធ្លាក់មក​វិញ​ចំ​​ក្បាល​ស្ត្រី​​ម្នាក់​​​ស្លាប់​ភ្លាមៗ ​បង្ក​ឱ្យ​មាន​ការ​ភ្ញាក់​ផ្អើល​ពេញភូមិ កាលពី​​វេលា​​ថ្ងៃ​ត្រង់ ថ្ងៃទី១ ខែធ្នូ ឆ្នាំ២០១៧ ស្ថិត​នៅ​ក្នុង​ភូមិ​ស្រែសៀម ឃុំ​ជីរោទិ៍ទី២ ស្រុក​ត្បូង​ឃ្មុំ ខេត្ត​ត្បូង​ឃ្មុំ​។

​ប្រភព​បន្តថា ស្ត្រី​រងគ្រោះ​​​ឈ្មោះ ខេង សំណាង អាយុ​៣៣​ឆ្នាំ មានប្តីឈ្មោះ ​មិន សុខ អាយុ​៣៥​ឆ្នាំ មាន​ទីលំនៅ​ស្នាក់​នៅ​ភូមិ-ឃុំខាង​លើ។

បើតាម​សម្តីប្តីស្រ្តីរងគ្រោះបាន​ឲ្យដឹងថា ​មុន​ពេល​កើតហេតុ ​គាត់​បាន​ចេញពី​ផ្ទះ​ទៅ​ស៊ីឈ្នួល​ច្រូត​ស្រូវ​ឱ្យ​គេ។ ចំណែក​ប្រពន្ធ​របស់​គាត់​​មិន​បាន​ទៅ​ជាមួយទេ ព្រោះនាងជាប់រវល់​ចូល​រួម​ពិធីភ្ជាប់ពាក្យអ្នក​ជិត​ខាង។ លុះ​រហូត​ដល់​វេលា​ម៉ោង​ជាង​១១​ព្រឹក ប្រពន្ធ​​របស់​គាត់​បាន​យក​បាយ​មក​ឲ្យគាត់​នៅដល់​វាល​ស្រែ​ច្រូត​ស្រូវ។ ខណៈ​នោះ​ស្រាប់តែ​​ឮសំឡេង​កន្តឹងបានរោទិ៍ឡើង​ចេញពី​ការ​ដ្ឋានវាយថ្មរបស់លោកឧកញ៉ាខាងលើយ៉ាងកងរំពង ធ្វើ​ឲ្យគាត់ និងប្រពន្ធ រួមទាំងអ្នកច្រូតស្រូវជាមួយគ្នា ​ម្នាក់ៗ​​ភ័យស្លន់​ស្លោរ ​នាំគ្នា​​រត់​ចេញ​​ឆ្ងាយ​​ពីទី​នោះ​ប្រហែល​ជាង​៧០០​ម៉ែត្រ ប៉ុន្តែ​ជា​អកុសល​ ​​បំណែក​ថ្មដែលគេបំផ្ទុះថ្ម​​ចេញពី​ការ​ដ្ឋាន​នោះ បាន​ផ្លោង​មក​ត្រូវ​ចំ​ក្បាល​ប្រពន្ធ​របស់​គាត់​ បណ្តាល​ឱ្យ​ស្លាប់​ភ្លាមៗ​នៅ​កន្លែង​កើតហេតុតែម្តង។

ជុំ​វិញ​ករណី​ខាងលើ​នេះ​ បុរស​ជា​ប្តីស្ត្រី​រងគ្រោះ បានសំណូម​ពរ​​ឱ្យ​លោក​ឧកញ៉ា លីន ប៊ុណ្ណា ម្ចាស់​ការ​ដ្ឋាន សូម​​ជួយ​ដោះ​ស្រាយ ​ធ្វើ​យ៉ាង​ណាឲ្យកូន​របស់​គាត់​២​នាក់​បានរៀន​ចប់​ចុងចប់​ដើមផង។ ទោះ​បី​ជា​យ៉ាង​ណា មិន​ទាន់​មាន​ការ​ឆ្លើយ​តប​ពី​ខាង​លោកឧកញ៉ា​នៅឡើយទេ ប៉ុន្តែ​គាត់​បាន​ផ្ញើបច្ច័យ​តាម​រយៈ​មេ​ឃុំ​ ចូល​រួម​បុណ្យ​សព​ស្ត្រី​រងគ្រោះ​ផង​ដែរ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor