ភ្នំពេញៈ ពិធីមង្គលការកំពូលតារាចម្រៀងស្រីល្បីឈ្មោះក្នុងផលិតកម្មហង្សមាស សុគន្ធ នីសា បានដំណើរការក្រោមសភាពអូរអរបំផុតកាលពីម្សិលមិញនេះ ដោយមានវត្តមានសាច់ញាតិ ចាស់ទុំទាំងសងខាងទទួលដឹងឮ និងអបអរសាទរទៀតផង។
អ្នកនាង សុគន្ធ និសា និងស្វាមី ត្រូវបានមហាជនចាប់អារម្មណ៍ជាខ្លាំង ពិសេសម្នាក់ៗកំពុងរង់ចាំតាមដានទស្សនា និងចង់ដឹងថា តារាស្រីរូបនេះ នឹងស្រស់ស្អាតយ៉ាងណាក្នុងថ្ងៃដ៏ពិសេសមួយនេះ។ ប៉ុន្តែគួរឲ្យស្តាយដែល នីសា មិនចង់ឲ្យបណ្តាញសារព័ត៌មានចូលអ៊ូអរពេញទឹកពេញដីឡើយ ព្រោះខ្លាចប៉ះពាល់បរិយាកាសពិធី ដែលមានភ្ញៀវលំដាប់ៗចូលរួមអបអរសាទរនោះ។
ពិធីមង្គលការរបស់ សុគន្ធ នីសា មិនអនុញ្ញាតឲ្យអ្នកសារព័ត៌មាន ចូលផ្តិតយករូបភាពចាប់តាំងពីដើមទីនៃកម្មវីធីសំពះផ្ទឹម តាំងពីល្ងាចថ្ងៃទី៣០ ខែធ្នូមកម្ល៉េះ។ លុះព្រឹកឡើង អ្នកសារព័ត៌មាន អាចថតរូបភាពពេលហែជំនូនបានបន្តិចតែប៉ុណ្ណោះ ក៏ត្រូវបានបិទមិនអនុញ្ញាតឲ្យចូលថតកម្មវិធីមួយចំនួនទៀត នៅគេហដ្ឋានរបស់នាងឡើយ។
ចំណុចនេះ ត្រូវបានអ្នកគាំទ្រ នីសា និយាយថា នីសា មិនចង់ឲ្យពិធីមង្គលការរបស់នាងសាយភាយទូលំទូលាយទេ ព្រោះខ្លាចពិបាកទាញសំឡេងគាំទ្រនៅលើវិថីចម្រៀង។ ត្បិតអី តារាចម្រៀងស្រី ដែលមានស្វាមីហើយ តែងតែពិបាកប្រជែងការគាំទ្រណាស់៕
