កាលពីព្រឹកថ្ងៃទី២៥ ខែធ្នូ ឆ្នាំ ២០១៧ ព្រះអង្គម្ចាស់ នរោត្តម រណឫទ្ធិ បានជួបជាមួយលោក វ៉ាង វៃគួង ប្រធានវិទ្យាស្ថានវិទ្យាសាស្ត្រសង្គមនៃសាធារណរដ្ឋប្រជាមានិតចិននៅសណ្ឋាគារ intercontinental Hotel។ ក្នុងជំនួបទ្វេភាគី ព្រះអង្គបានស្នើសុំជំនួយពីរដ្ឋាភិបាលចិនដើម្បីគាំទ្រដល់គណបក្សរាជានិយមដែលទើបតែទទួលបានកៅអីនៅក្នុងរដ្ឋសភាថ្មីៗ។
អតីតនាយករដ្ឋមន្ត្រីទី១មានបន្ទូលថា៖ ខ្ញុំបានស្នើថាប្រទេសចិនដែលបានជួយដល់យើងខ្ញុំហើយការពិតយើងខ្ញុំក្លាយទៅជាគណបក្សទី២ មែន ក៏ប៉ុន្តែវាក្រជាងគេ វាក្រជាងគេតែម្ដង វាគ្មានអីសោះ ហើយចិនគាត់ថាចាំគាត់រាយការណ៍ជូនឯកឧត្តម ស៊ី ជីនភីង ប្រធានាធិបតីចិន ហើយគាត់នឹងបន្តនៅជាមួយដែលគាត់ធ្លាប់បានផ្តល់ឲ្យមកហ៊្វុនស៊ិនប៉ិច តទៅទៀត។
ព្រះអង្គមានព្រះបន្ទូលថា៖ ទិសដៅរបស់ខ្ញុំគឺចង់ពង្រឹងគណបក្សរាជានិយម សីហនុនិយម ហ៊្វុនស៊ិនប៉ិចតែប៉ុណ្ណឹង។គណបក្សហ៊្វុនស៊ិនប៉ិចបានក្លាយគណបក្សប្រឆាំងធំជាងគេនៅកម្ពុជា ទទួលបានអាសនៈ ៤១ ពីអតីគណបក្សសង្គ្រោះជាតិ។
គួររំលឹកថា គណបក្សហ៊្វុនស៊ិនប៉ិច គឺជាអ្នកផ្ដើមគំនិតប្ដឹងទៅក្រសួងមហាផ្ទៃដើម្បីរំលាយគណបក្សសង្គ្រោះជាតិ។ ចិនធ្លាប់ផ្តល់ជំនួយដល់ហ៊្វុនស៊ិនប៉ិចកន្លងមកនោះរួមមានកុំព្យូទរ័ សៀវភៅសរសេរ ប៊ិក គឺជារបស់ដែលធ្វើនៅប្រទេសចិនទាំងអស់។
