កាលពីថ្ងៃទី២៥ ខែធ្នូ ឆ្នាំ២០១៧ លោក ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន បានសរសេរលិខិតចំហបង្ហោះតាមហ្វេសប៊ុកស្នើឲ្យសមត្ថកិច្ចពាក់ព័ន្ធដកលិខិតឆ្លងដែនរបស់អតីតមន្ត្រីគណបក្សសង្គ្រោះជាតិចំនួន ១១៨ រូប និងមន្ត្រីសង្គមស៊ីវិលដែលលោកអធិប្បាយថាកំពុងធ្វើនយោបាយខុសច្បាប់នៅក្រៅប្រទេស។
ក្នុងលិខិតចំហនោះ បានលើកឡើងថាមន្ត្រីទាំងនោះ បានព្យាយាមញុះញង់ កៀរគរ និងស្វែងរកការគាំទ្រពីបរទេស ដើម្បីដាក់ទណ្ឌកម្មសេដ្ឋកិច្ចក៏ដូចជាបំផ្លាញសង្គមកម្ពុជា បំផ្លាញសេចក្តីសុខ សន្តិភាពរបស់ប្រជាជនកម្ពុជា។ ហើយមន្ត្រីទាំងនោះកំពុងធ្វើសកម្មភាពនយោបាយដូចជាការដឹកនាំបាតុកម្មនៅក្រៅប្រទេសជាដើម។
ដោយលោកបានស្នើថា៖ សូមសមត្ថកិច្ចពាក់ព័ន្ធ កុំព្រងើយកន្តើយ និងសូមអំពាវនាវដល់សមត្ថកិច្ចពាក់ព័ន្ធនឹងលិខិតឆ្លងដែនចាត់វិធានការដកហូតលិខិតឆ្លងដែនកម្ពុជាពីអតីតមន្ត្រីគណបក្សសង្គ្រោះជាតិចំនួន ១១៨ រូបដែលត្រូវបានច្បាប់ហាមឃាត់មិនឱ្យធ្វើសកម្មភាពនយោបាយរយៈពេល៥ឆ្នាំ រួមទាំងមន្ត្រីសង្គមស៊ីវិលគឺ លោក ប៉ា ងួនទៀង។
