
ភ្នំពេញៈ បុរសម្នាក់ជាកម្មករសំណង់ បានដេកស្លាប់នៅលើគ្រែ បង្កការភ្ញាក់ផ្អើលនៅវេលាម៉ោងជាង៧ព្រឹកថ្ងៃអង្គារ៍ ៩កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៦ ខែធ្នូ ឆ្នាំ២០១៧ នៅក្នុងសំណង់ផ្ទះល្វែង១កន្លែង ស្ថិតក្នុងភូមិព្រែកទាល់១ ផ្លូវបេតុង សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។
សមត្ថកិច្ច បានឲ្យដឹងថា សពឈ្មោះ ជ័យ សុខ ភេទប្រុស អាយុ៣៣ឆ្នាំ កម្មករសំណង់ បច្ចុប្បន្នស្នាក់នៅក្នុងការដ្ឋានសំណង់ មានស្រុកកំណើតនៅស្រុករំដួល ខេត្តស្វាយរៀង។
ប្រភពពីកម្មករសំណង់ម្នាក់ បានប្រាប់ថា កាលពីល្ងាចថ្ងៃទី២៥ បុរសរងគ្រោះបានចេញទៅផឹកស៊ីជាមួយមិត្តភក្តិនៅក្រៅការដ្ឋានសំណង់ រហូតដល់ម៉ោងជាង៧យប់ ទើបត្រឡប់វិញហើយបានហូបបាយជុំគ្នាតាមធម្មតាដូចសព្វដងរួចរាល់ក៏នាំគ្នាចូលដេកអស់។ លុះដល់ព្រឹកឡើងម៉ោងជាង៧ព្រឹកថ្ងៃទី២៦ ធ្នូ ឈ្មោះ មាន សារុំ អាយុ៣២ឆ្នាំ កម្មករសំណង់ជាមួយគ្នាបានហៅជនរងគ្រោះឲ្យក្រោកឡើងធ្វើការ។ ពេលហៅយ៉ាងម៉េចក៏មិនក្រោក ទើបដឹកថា ជនរងគ្រោះស្លាប់បាត់ហើយ។ ភ្លាមៗនោះក៏នាំគ្នារាយការណ៍ទៅសមត្ថកិច្ចតែម្តង។
ក្រោយពិនិត្យ និងកោសល្យវិច័យរួចរាល់ហើយ សាកសពក៏ត្រូវបានប្រគល់ឲ្យក្រុមគ្រួសារយកទៅស្រុកកំណើតធ្វើបុណ្យតាមប្រពៃណី៕

