ព្រះសីហនុៈ រថយន្តដឹកទំនាញ បោលបុករថយន្តទូរទស្សន៍អប្សរា បណ្ដាលឲ្យបុគ្គលិក៤រូប រងរបួស កាលពិវេលាម៉ោង៦៖២០នាទីព្រឹក ថ្ងៃទី២៦ ខែធ្នូ ឆ្នាំ២០១៧ លើផ្លូវជាតិលេខ៤ ចន្លោះគីឡូម៉ែត្រ១៩៩-២០០ ស្ថិតនៅក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងប្រាប់ថា គ្រោះថ្នាក់ចរាចរណ៍នេះ កើតឡើងរវាងរថយន្ត១គ្រឿងម៉ាក HYUNDAI ពណ៌ស ពាក់ស្លាកលេខ ភ្នំពេញ 3A-5998 ដឹកទំនិញ បុកជាមួយរថយន្តគ្រឿងម៉ាក NISSAN ពណ៌ស ពាក់ស្លាកលេខ ភ្នំពេញ 2X-6815 ជិះគ្នាចំនួន៤នាក់ស្រីម្នាក់ (ជាបុគ្គលិកទូរទស្សន៍អប្សរា) មានទិសដៅពីផ្ទុយគ្នា បណ្ដាលឲ្យភាគីខាងរថយន្តរបស់ទូរទស្សន៍ រងរបួសទាំង៤នាក់ ប៉ុន្តែស្ថានភាពរបួសមិនធ្ងន់ធ្ងរទេ។
ក្រោយកើតហេតុជនរងគ្រោះទាំង៤នាក់ ត្រូវបានបញ្ជូនទៅព្យាបាលនៅគ្លីនិកលិគឹមឌីវាលរេញ។ រីឯវត្ថតាងរថយន្តទាំង២គ្រឿង សមត្ថកិច្ចយកមករក្សាទុក នៅអធិការដ្ឋាននគរបាលស្រុកព្រៃនប់ រងចាំពេលក្រោយ៕
