
ស្ពានអាកាស ធ្វើពីកញ្ចក់ដ៏វែងជាងគេបង្អស់លើលោក បង្កើតឱ្យមានភាពព្រឺព្រួច រំជើបរំជួល ឬនិយាយម៉្យាងទៀតថា ភ័យអរៗនោះ ត្រូវបានបើកឲ្យដំណើរការហើយ កាលពីថ្ងៃទី២៤ ខែធ្នូ ឆ្នាំ២០១៧ កន្លងទៅ ។
ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃអង្គារ ទី២៦ ខែធ្នូ ឆ្នាំ២០១៧ នេះ បានផ្សាយថា ស្ពានបង្កើតឱ្យមានភាពភ័យ និងសប្បាយនេះ មានទីតាំងស្ថិតនៅលើជ្រលងភ្នំក្នុងក្រុងហ្ស៊ីជាជួង (Shijiazhuang) នៃខេត្ត ហេបី (Hebei) ក្បែររដ្ឋធានីប៉េកាំង ប្រទេសចិន។

ស្ពានកញ្ចក់នេះ ធ្វើឡើងពីផ្ទាំងកញ្ចក់ថ្លា ចំនួន ១,០៧៧បន្ទះ កម្រាស់ ០៤សង់ទីម៉ែត្រ និងមានទម្ងន់សរុប ៧០តោន ប្រវែង ៤៨៨ម៉ែត្រ ទទឹងប្រវែង០២ម៉ែត្រ ស្ថិតនៅកម្ពស់ ២១៨ម៉ែត្រ នៃជ្រលងភ្នំដ៏ចោតចំនួន ០២ ក្នុងតំបន់ទេសភាព ហុងយ៉ាគូ (Hongyagu)។

ស្ពានកញ្ចក់ដ៏វែងជាងគេបំផុតនេះ ចំណុចពិសេសរបស់វាដែលបង្កើតបរិយាកាសឱ្យភ្ញៀវទរសចររំជួលចិត្តនោះ គឺដោយសារតែគេធ្វើឡើង ឱ្យមានសភាពយោលយោគបន្តិច និងរាងចោតកណ្ដាល ដែលជាការញ៉ាំងឱ្យភ្ញៀវទេសចរ ព្រឺព្រួច រំជើបរំជួល ព្រោះតែមើលឃើញជ្រលងជ្រោះជ្រៅនៅខាងក្រោម គួរឱ្យស្ញើប៕



