ភ្នំពេញៈ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា ការទាមទារឲ្យមានការដោះលែងលោក កឹម សុខា អតីតប្រធានគណបក្សសង្រ្គោះជាតិ ដើម្បីឲ្យធ្វើនយោបាយឡើងវិញ គឺជាការរំលោភលទ្ធិប្រជាធិបតេយ្យនៅកម្ពុជា។
ការថ្លែងរបស់លោកនេះ បន្ទាប់ពីអ្នកគាំទ្រលោក កឹម សុខា ក៏ដូចជាអតីតបក្សប្រឆាំងជាច្រើនរយនាក់ បាននាំគ្នាតវ៉ានៅក្រៅប្រទេសដើម្បីទាមទារឲ្យមានការដោះលែង លោក កឹម សុខា ឲ្យមានសេរីភាពវិញ ដើម្បីចូលរួមប្រលូកក្នុងឆាកនយោបាយដូចដើមវិញ។
លោក សុខ ឥសាន បានថ្លែងតាមរយៈតេឡេក្រាម នៅថ្ងៃទី១១ ខែធ្នូឆ្នាំ២០១៧ថា ការទាមទារឲ្យដោះលែងជនក្បត់ជាតិ និងឲ្យអតីតបក្សរំលោភច្បាប់ធ្វើនយោបាយវិញ គឺជាការរំលោភលទ្ធិប្រជាធិបតេយ្យ និងនីតិរដ្ឋ។ កន្លងទៅក្រោយការចាប់ខ្លួនលោក កឹម សុខា និងរំលាយបក្សប្រឆាំង ដោយតុលាការកំពូលក្រុមបក្សប្រឆាំង មជ្ឈដ្ឋានគាំទ្របក្សប្រឆាំង បានធ្វើសកម្មភាព ទាមទារឲ្យដោះលែងលោក កឹម សុខា និងឲ្យបក្សប្រឆាំងបានធ្វើសកម្មភាពនយោបាយវិញ ។
លោកថា “ការទាមទារបែបនេះ គឺជាទាមទាររំលោភ ទៅលើគោលការណ៍លទ្ធិប្រជាធិបតេយ្យ និងនីតិរដ្ឋនៅកម្ពុជា និងប្រឆាំងនឹងស្មារតីកិច្ចព្រមព្រៀងទីក្រុងប៉ារីសថ្ងៃ ២៣ តុលា ឆ្នាំ១៩៩១ ផងដែរ”។
លោកបន្តថា បញ្ហាដែលកើតឡើងបណ្តាលមកពីអតីតមេបក្សប្រឆាំងរូបនេះ និងបក្សប្រឆាំង បានប្រព្រឹត្តអំពើល្មើសច្បាប់ ត្រង់មាត្រា ៤៤៣ នៃក្រមព្រហ្មទណ្ឌកម្ពុជា និងច្បាប់ស្តីពីគណបក្សនយោបាយមាត្រា៦ ថ្មី២ មាត្រា ៧ថ្មី មាត្រា ៣៨ថ្មី ។
លោកបន្ថែមថា លោក កឹម សុខា ពិតជាបានប្រព្រឹត្ត តាមការលាតត្រដាងបែបនេះមែន ដោយលោក កឹម សុខា ខ្លួនឯងផ្ទាល់ ហើយគណបក្សប្រឆាំង ក៏ពិតជាបានប្រព្រឹត្តល្មើសច្បាប់ដែរ ដោយត្រូវតែទទួលខុសត្រូវខ្លួនឯង គ្មានអ្នកណាបង្កើតកំហុសឲ្យខ្លួនទេ ។ ដូចនេះ ការទាមទារឲ្យមានការដោះលែង លោក កឹម សុខា និងទាមទារឲ្យអតីត បក្សប្រឆាំង អាចមានសកម្មភាពឡើងវិញ គឺជាការរំលោភសិទ្ធិ និងរំលោភសមត្ថកិច្ច របស់តុលាការកំពូល និងលទ្ធិប្រជាធិបតេយ្យនីតិរដ្ឋនៅកម្ពុជា៕
