ក្នុងពិធីសំណេះសំណាលជាមួយកម្មករ កម្មការនី ចំនួន១៦ ១១៨នាក់ មកពីរោងចក្រចំនួន១៤ នៅតំបន់ទួលពង្រ ខណ្ឌពោធិ៍សែនជ័យ រាជធានីភ្នំពេញ នៅព្រឹកនេះ សម្តេច ហ៊ុន សែន បានមានប្រសាសន៍ថា៖ សុំផ្តាំទៅអតីបក្ស សង្គ្រោះជាតិកុំយកកម្ពុជាជាចំណាប់ខ្មាំង ហើយក៏គ្មានថ្ងៃបក្សនេះ រស់ឡើងវិញដែរ។
សម្តេចបានសង្កត់ធ្ងន់ថា៖ បើអ្នកឯងមិនចូល គេក៏មិនស្លាប់ដែរ បើអ្នកឯងមិនចូល គេក៏នៅតែបោះឆ្នោតដែរ អ្នកចង់ចូលរួមក៏ជាសិទ្ធិបោះឆ្នោតរបស់អ្នក អ្នកមិនចង់ចូលរួមក៏ជាសិទ្ធិបោះឆ្នោតរបស់អ្នក អ្នកចង់ទៅបោះឆ្នោតក៏ជាសិទ្ធិបោះឆ្នោតរបស់អ្នក អ្នកមិនចង់ទៅបោះឆ្នោតក៏ជាសិទ្ធិបោះឆ្នោតរបស់អ្នក។
លោកនាយករដ្ឋមន្រ្តីបន្តថា៖ អ្នកលោកបង្កើតកំហុសដ៏ធ្ងន់ធ្ងររហូតដល់ទោសក្បត់ជាតិ អស់លោកអ្នកកុំទាញឱ្យគេខុសជាមួយ បក្ស (បក្សសង្គ្រោះជាតិ) នោះវាងាប់បាត់ទៅហើយ តើកម្ពុជាកំពុងតែងាប់ឬអី?
ប្រទេសនេះមិនមែនជាចំណាប់ខ្មាំងរបស់អ្នកទេ ប្រទេសនេះជាកម្មសិទ្ធិរបស់ប្រជាជន។ មន្ត្រីគណបក្សកាន់អំណាចមិនគួរនិយាយជាមួយពួកនៅក្រៅច្បាប់។
រឿងរបស់ខ្ញុំ គឺគ្រប់គ្រងយ៉ាងមិចឱ្យប្រទេសមានសន្តិភាព បន្តលើផ្លូវអភិវឌ្ឍន៍ ប្រទេសកម្ពុជាដែលនឹងបន្តដំណើរលើផ្លូវលទ្ធិប្រជាធិបតេយ្យ សេរីពហុបក្ស តាមរយៈការចាត់តាំងរៀបចំការបោះឆ្នោតឱ្យបានទៀតទាត់ ត្រឹមត្រូវ សេរី និងយុត្តិធម៌ និងមានតម្លាភាពដែលអាចទទួលយកបាន នេះគឺជាការបញ្ជាក់របស់សម្តេច។
