តាកែវៈ ល្បែងស៊ីសងត្រូវបានគេចាត់ទុកថា ជាដើមចមនៃបទល្មើស ហើយកាលណាអាជ្ញាធរមានសមត្ថកិច្ច មិនយកចិត្តទុកដាក់ ឬមិនបង្រ្កាបទេនោះ ល្បែងមួយនេះនឹងរីករាលដាលពាសពេញផ្ទៃប្រទេស ដែលជាហេតុនាំឲ្យសម្បូរទៅដោយបទល្មើស អំពើចោរកម្ម និងបង្កអសន្តិសុខទៀតផង។
ប្រជាពលរដ្ឋបានរាយការណ៍មកថា ក្រោយដំណើរការរាប់ឆ្នាំ នៅភូមិត្រពាំងលើក ឃុំកណ្តឹង ស្រុកបាទី ខេត្តតាកែវ ទីតាំងវង់ល្បែងជល់មាន់ដ៏ធំមួយកន្លែងរបស់កូនប្រសាលោក ហ៊ុន សាន ឈ្មោះ ថៃ ផានី ហៅ ម៉ាប់ ពេលនេះ ត្រូវបានអាជ្ញាធរបង្រ្កាបហើយ ប៉ុន្តែមិនត្រូវបានចាប់ខ្លួនមនុស្សឡើយ។
តាមសេចក្តីរាយការណ៍ថា កម្លាំងគណៈបញ្ជាការឯកភាពខេត្តតាកែវ ដឹកនាំដោយលោក ឡាយ វណ្ណៈ អភិបាលខេត្តតាកែវ សម្របសម្រួលនីតិវិធីដោយលោកព្រះរាជអាជ្ញារងអមសាលាដំបូងខេត្ត នៅព្រឹកថ្ងៃទី៣ ខែធ្នូ ឆ្នាំ២០១៧នេះ បានចុះរុះរើ និងបិទទីតាំងជល់មាន់ និងល្បែងស៊ីសងខុសច្បាប់មួយកន្លែង ស្ថិតក្នុងភូមិត្រពាំងលើក ឃុំកន្តឹង ស្រុកបាទី ខេត្តតាកែវ។ ប្រតិបត្តិការបង្ក្រាបវង់ល្បែងបញ្ជល់មាន់នេះ សមត្ថកិច្ចចម្រុះបានដកហូតវត្ថុតាងខុសច្បាប់មួយចំនួន រួមមាន មាន់៦ក្បាល ជាលទ្រង់មាន់ និងសម្ភារៈមួយចំនួនទៀតផងដែរ។
អភិបាលស្រុកបាទី លោក អ៊ុក រី និងអភិបាលខេត្តតាកែវ លោក ឡាយ វណ្ណៈ សារព័ត៌មាន Cam Post នៅមិនអាចទំនាក់ទំនងសុំការពន្យល់បានទេជុំវិញរឿងនេះ ដោយទូរស័ព្ទមិនចូល។
កូនប្រសាលោក ហ៊ុន សាន លោក ថៃ ផានី ហៅ ម៉ាប់ កាលពីពេលកន្លងទៅ ធ្លាប់បានប្រាប់ Cam Post តាមទូរស័ព្ទថា លោកបើកល្បែងជល់មាន់ដើម្បីទ្រទ្រង់ការងារខ្លះ ក្នុងនោះ លោកបានរៀបរាប់ថា មាននៅស្រុកបាទី ខេត្តតាកែវ នៅខេត្តត្បូងឃ្មុំ និងនៅឃុំអរិយក្សត្យ ស្រុកល្វាឯម ខេត្តកណ្ដាល ជាដើម។
កាលពីពេលកន្លងទៅ ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ សម្តេចក្រឡាហោម ស ខេង បានក្រើនរំឭកដល់មន្ត្រីមានសមត្ថកិច្ចទូទាំងប្រទេស សូមឲ្យមានវិធានការបង្រ្កាបឲ្យអស់ពីក្នុងមូលដ្ឋានរៀងៗខ្លួន នូវល្បែងស៊ីសងគ្រប់ប្រភេទឲ្យស្របតាមគោលនយោបាយឃុំសង្កាត់មានសុវត្ថិភាពរបស់រដ្ឋាភិបាលទាំង៩ចំណុច។
ស្រដៀងគ្នានេះ អភិបាលខេត្តកណ្តាល លោក ម៉ៅ ភិរុណ ក៏ធ្លាប់បានព្រមានដកតំណែងអធិការនគរបាល និងមេបញ្ជាការកងរាជអាវុធហត្ថ បើអសមត្ថភាពក្នុងការបង្ក្រាបល្បែងស៊ីសង។
ប្រជាពលរដ្ឋរស់នៅស្រុកល្វាឯម និងស្រុកខ្សាច់កណ្ដាល ខេត្តកណ្ដាល បាននិយាយថា ល្បែងជល់មាន់ ឬបក្សីកីឡាដ៏ធំ បាន និងកំពុងបើកលេងស្ទើររៀងរាល់ថ្ងៃ នៅចំណុចផ្លូវច្រកចូលវត្តខ្សាច់ ហើយក៏កំពុងក្លាយជាដើមចមនៃអំពើចោរកម្មផ្សេងៗ ដែលកំពុងយាយី និងបង្កទុក្ខសោកដល់ពលរដ្ឋ ស្ទើរលួសព្រលឹងជារៀងរាល់ថ្ងៃផងដែរ៕
